Чемпионатта Қазақстан, Өзбекстан, Қырғызстан, Венгрия, Тәжікстан, Түркіменстан, Моңғолия, Қытай, Ауғанстан, Ресей спортшылары бақ сынады. «Бұл – үш стильде өтіп жатқан бірінші Азия чемпионаты. Жарысқа алыс-жақын шетелдерден спортшылар қатысып жатыр. Бұл чемпионатты алдағы 5-ші Дүниежүзілік көшпенділер ойындарына дайындық десек де болады. Өйткені теңге ілу ептілікті, көп тәжірибені қажет етеді. Спортшылар осындай үлкен дәрежедегі сайыстар арқылы тәжрибе жинап, шеберліктерін шыңдай түседі», - деді Теңге ілу халықаралық федерациясының президенті Амангелді Әбдіқадыров.«Чемпионатта 10 елдің спортшылары теңге ілудің үш стилі: «Бес белес», «Қос құлаш» және «Жеті құт» бойынша сынға түсті. Осы халықаралық чемпионатты өткізудегі мақсатымыз ұлттық ойынымызды өзге елдерде де танымал ету болатын. Қазір шетелдік спортшылар айтарлықтай шеберлік көрсетіп жатыр деп айта алмаймыз. Дегенмен, бүгінде Қырғызстан мен Моңғолияның спортшылары жақсы ойын өрнегін көрсетіп, біздің спортшыларымызға басты бәсекелес болып жатыр», - деді ат спорты түрлерінен мемлекеттік жаттықтырушы Нүркен Байбөриев. Ал Қырғызстаннан келген спортшы Алый Назаров теңге ілуден чемпионатқа бірінші рет қатысып отырғанын және жарыс жоғары деңгейде өткенін айтты. Сонымен, теңге ілу спортынан өткен алғашқы Азия чемпионатында «Бес белес» стилі бойынша 1-орынды қазақстандық Ғалымжан Ізжанов алды. 2-орынды Монғолиядан келген спортшы Айболат Ұнатхан, ал 3-орынды қырғызстандық Асхат Талайбеков иеленді.«Қос құлаш» стилінде 1-орынды Қазақстан спортшысы Рахат Қамбаров қанжығаға байлады. 2-орын Қырғызстаннан келген Алый Назаровқа, 3-орын өзбекстандық Азизбек Закиржановқа бұйырды. «Жеті құт» стилінде де жерлестеріміз үздік болып, 1-орынды Бақыт Төлтай жеңіп алды. 2-орын монғолиялық спортшы Серік Жеңісбектің еншісене тисе, 3-орынды Өзбекстаннан келген Қодиржон Егембердиев иеленді.Осылайша, теңге ілуден Сары құрлық чемпионатында қазақстандық команда абсолютті чемпион атанды. Ал Қазақстан ұлттық құрамасының мүшесі Рахат Қамбаров сайыстың үздік теңге ілушісі атағын иеленді. Жарысты ҚР Туризм және спорт министрлігі, ҚР Ұлттық спорт қауымдастығы, Алматы облысы әкімдігінің және Ұлттық және ат спорты орталығының қолдауымен Республикалық теңге ілу федерациясы ұйымдастырды. Іс-шараның бас серіктесі – «Самұрық Қазына» АҚ, серіктесі – Sport Qory спортты қолдау қоры. Бұған дейін осы Азия чемпионаты қарсаңында Теңге ілуден халықаралық федерациясы құрылған болатын. Федерацияның негізін қалаған мемлекеттер: Қазақстан, Қытай, Моңғолия және Венгрия елдерінің ұлттық федерациялары.Еске сала кетейік, Республикалық теңге ілу федерациясы Қазақстан Республикасы Ұлттық спорт қауымдастығының құрамына кіреді. Қауымдастық құрамында бұдан өзге бәйге, көкпар, аударыспақ, садақ ату, жамбы ату, құсбегілік, асық ату, «JORYQ» ат спорты және т.б. федерациялар бар. ҚР Ұлттық спорт қауымдастығын белгілі кәсіпкер, меценат, «Altyn Qyran Foundation» Қоғамдық қоры Қамқоршылық кеңесінің төрағасы Исламбек Салжанов басқарады.

Ақпарат көзі: ​ГУ «Аппарат акима Алматинской области»