Жоғары Сот Кеңесінің төрағасы Д.А. Шипп, Жоғары Сот Кеңесінің хатшысы – аппарат басшысы Д.Б. Мұратбеков, Кеңес мүшесі А.Б. Жакулин жұмыс сапарымен Өзбекстанға барып қайтты. Халықаралық ынтымақтастық жөніндегі Герман қоғамының (GIZ) қолдауымен өткен жұмыс сапары шеңберінде Өзбекстан Республикасы Жоғары судьялар кеңесінің төрағасымен және мүшелерімен кездесу өтті.

Жоғары Сот Кеңесінің төрағасы Д.А. Шипп құттықтау сөз сөйлеп, кеңестердің алдында тұрған жалпы сын-қатерлерді шешуде халықаралық диалог пен кооперацияның маңыздылығын атап өтті.

Кездесу аясында қазақстандық делегацияға Өзбекстанда судьялар корпусын құру тәртібі және судья қызметінің тиімділігін электрондық рейтингтік бағалау тәртібі туралы ақпарат ұсынылды. Сонымен қатар, Өзбекстан Республикасы Жоғары судьялар кеңесінің өкілдері судьялар клубының қызметі туралы айтып берді.

Өз кезегінде, өзбек тарапының сұрақтарына жауап бере отырып, делегация Төрағасы мен мүшелері Қазақстанның Жоғары Сот Кеңесі қызметінің негізгі бағыттары туралы айтып берді. 

Сондай-ақ, жұмыс сапары барысында қазақстандық делегация Самарқанд облыстық сотына және Судьялардың жоғары мектебіне барды. Облыстық сотта кеңес өкілдері сот отырысы залдарын қарап, бейнеконференцбайланыс үшін жабдықтардың мүмкіндіктерін бағалап, ұжыммен кездесті.

Делегация мүшелері Судьялардың жоғары мектебіне барған кезде оқу орнының материалдық-техникалық жабдықталуымен танысты, сондай-ақ профессор-оқытушылар құрамымен және мектеп түлектерімен әңгімелесті.

Жұмыс сапарының қорытындысы бойынша Қазақстан Республикасының Жоғары Сот Кеңесі мен Өзбекстан Республикасының Жоғары судьялық кеңесі арасында екіжақты ынтымақтастық туралы Меморандумға қол қойылды. Тараптар өз өкілеттіктері шеңберінде және өз құзыреті шегінде соттарды қалыптастыру жүйесін, судьялардың тәуелсіздігі мен оларға қол сұғылмаушылық кепілдіктерін жетілдіруге, сондай-ақ тәртіптік жаза қолдануға және судьялардың өкілеттіктерін тоқтатуға бағытталған ынтымақтастық жөнінде шаралар қабылдауға уағдаласты.

Жоғары Сот Кеңесінің Аппараты

Ақпарат көзі: Қазақстан Республикасы Жоғары Сот Кеңесі