Baitursynuly University-де Студенттер үйінің жаңа корпустары ашылды

  Бүгін Ахмет Байтұрсынұлы атындағы Қостанай өңірлік университетінде Студенттер үйінің салтанатты ашылуы өтті. Үш қабатты ғимарат 324 адамға есептелген.

  Жаңа жатақханада 2, 3, 4 адамға арналған бөлмелер бар. Ғимаратта ас үй, кір жуатын бөлме және сақтау бөлмесі бар. Студенттерге ыңғайлы болу үшін оқу және демалыс орындары ойластырылған. Алдағы уақытта жаттығу залы мен дүкеннің ашылуы жоспарланған.

  Қостанай облысының әкімі Құмар Ақсақалов жатақханалардағы орын тапшылығын қысқарту үшін мақсатты түрде жұмыс істелініп жатқанын атап өтіп, ЖОО студенттердің жатақханаға деген қажеттілігі толығымен өтелгенін атап өтті.

  «Біз бар күш-жігерімізді студенттеріміздің жайлы оқуы мен өмір сүруіне қолайлы жағдай жасауға бағыттаймыз. Университетте жатақханаларда орын тапшылығы 100 пайызға жойылды. Бұл, әсіресе, басқа қалалар мен ауылдардан келетін студенттер үшін өте маңызды. Ертең түлектеріміз ел дамуына сүбелі үлес қосуы үшін бүгінде жастардың білім алуына барлық жағдай жасап жатырмыз, - деп атап өтті ҚӨУ Басқарма Төрағасы-Ректоры Сейтбек Қуанышбаев.

Ақпарат көзі: Қазақстан Республикасы Ғылым және жоғары білім министрлігі