Целиноград ауданында елді мекендерді қардан тазарту жұмыстары қарқынды жүргізілуде. «Көктемге дайындық» акциясы аясында полигондарға 173 мың текше метрден астам қар шығарылды.

Көшелерді тәулік бойы 80-ге жуық арнайы техника – тракторлар, тиегіштер, құм таратқыштар мен автогрейдерлер тазартып жатыр.

Су тасқыны кезеңі қарсаңында қарды шығару, автомобиль және теміржол су өткізу құрылыстарын қар мен қоқыстан тазарту жұмыстары белсенді жүргізілуде. Сонымен қатар, инертті материалдар қоры дайындалуда. Наурыз айының басында дренаждық-арық жүйелерін тазарту және елді мекендерге жақын орналасқан алқаптарды «қаралау» жұмыстары басталады. Бұл шаралар су тасқыны жиі тіркелетін аймақтарда еріген судың ағынын жақсартуға бағытталған.

Су тасқыны қаупінің алдын алу мақсатында тұрғындармен түсіндіру жұмыстары да жүргізілуде. Жеке аулалардан қарды уақтылы шығару, оны көшеде үйіп, кейіннен полигонға әкету, арықтар мен су өткізу құбырларын бітемеу және оларды тазарту қажеттілігі ескертілді. Сондай-ақ, тұрғындарға үй маңындағы аумақты нығайту үшін инертті материалдар мен қаптарды алдын ала дайындау ұсынылады.

Су тасқыны жағдайында жергілікті атқарушы органдар суды сору үшін жеңдері бар мотопомпалар дайындады. Наурыз айының екінші онкүндігінен бастап тәулік бойы су тасқынына қарсы штаб өз жұмысын бастайды.

Көп жылдық мониторинг нәтижелері бойынша Целиноград ауданында 27 елді мекен су басу қаупі жоғары аймақтарға жатқызылған. 2024 жылы су тасқыны қаупін азайтуға бағытталған кешенді инженерлік-қорғау шаралары жүргізілді.

Халықты ықтимал эвакуациялау үшін 8 уақытша орналастыру пункті белгіленіп, оларда тамақтануды ұйымдастыру бойынша тиісті келісімдер жасалды. Сонымен қатар, ауыл шаруашылығы жануарларын орналастыру үшін 11 арнайы жайылымдық алаң дайындалды.

Ақпарат көзі: ГУ «Аппарат акима Акмолинской области»