Елордада 3 сәуірде балалар мен жасөспірімдер арасындағы «Шаттық-2025» 18-ші қалалық шығармашылық байқауы бастау алды. Оған қаладан 10 мыңға жуық оқушы қатысты, деп хабарлайды Астана әкімдігінің ресми сайты.

Жарыс бір ай бойы өтеді. Елордадағы 146 білім ошағынан 9800 оқушы өз өнерлерін ортаға салады.

Олар халық әні мен хореографиясынан бастап театр өнері мен фотосуретке дейін – 20 номинация бойынша 10 жанрда сынға түседі.

Жарыс бірден бірнеше жерде өтіп жатыр. Сонымен, бүгін М.Өтемісұлы атындағы Оқушылар сарайында 7 мен 18 жас аралығындағы топтар қатысатын «Хореография» бағдарламасы басталды. Онда әртүрлі би стильдерінде 122 нөмір көрсетіледі.

Сондай-ақ, Кәрім Мыңбаев атындағы №59 мектеп-лицейінде театрландырылған қойылымдар ұйымдастырылды. Мектеп оқушылары драма, мюзикл, әдеби-музыкалық шығармалар ұсынады. Ал Техникалық және көркем шығармашылық орталығында жас фотографтар айналадағы дүниенің өзіндік ерекшелігі мен көркем көрінісі бойынша жарысады.

«Шаттық» – бұл жай ғана байқау емес. Бұл – нағыз таланттар бағын ашатын шығармашылық кеңістік. Мұнда балалар өнер көрсетуді ғана емес, сонымен қатар бір-бірінен қолдау тауып, достар тауып, шабыттана бастайды. Бұл байқауда қаланың көптеген талантты өнерпаздары өсіп шықты», - деді Астана қаласы Білім басқармасының қосымша білім беру және тәрбие жұмысы бөлімінің басшысы Гүлфара Сарамбетова.

Жеңімпаздардың есімдері 29 сәуірде байқаудың үздік шығармашылық нөмірлері ұсынылатын гала-концертте жарияланады.

Ақпарат көзі: ГУ «Аппарат акима города Астана»