Алматы қаласында сыбайлас жемқорлыққа қарсы құқық қорғау органдарының GlobE жаһандық жедел желісінің жаңа аймақтық компонентін құру бойынша үш күндік Өңірлік кездесу басталды.

Бұл іс-шараны БҰҰ-ның Орталық Азиядағы Есірткі және қылмыс жөніндегі басқармасының Өңірлік өкілдігі ЕҚЫҰ, Сыбайлас жемқорлыққа қарсы іс-қимыл агенттігі және Бас прокуратура бірлесіп ұйымдастырды.

GlobE желісінің үйлестірушісі Розица Захариева ханым, БҰҰ ЕҚБ Орталық Азиядағы Өңірлік өкілі Ашита Миттал ханым, ЕҚЫҰ-ның өкілі Иван Калабуиг мырза алғы сөз сөйледі.

Бас прокуратураның атынан активтерді қайтару жөніндегі комитеттің жұмысына жетекшілік ететін Бас Прокурордың орынбасары Ғабит Садырбеков қатысушыларға сәлемдесу сөздерін арнады.

Кездесу барысында GlobE желісінің ағымдағы жай-күйін, трансұлттық сыбайлас жемқорлық істері бойынша өңірлік ынтымақтастық мәселелерін, осы желінің жаңа аймақтық бөлімшесін құру мақсаттарын, сондай-ақ үздік тәжірибе мен активтерді қайтарудың озық практикаларын талқылау жоспарлануда.

Шет елдер мен Орталық Азиядан келген сарапшылар аталған мәселелер бойынша өз ұстанымдарын білдіреді.

Бас прокуратураның баспасөз қызметі

Ақпарат көзі: Қазақстан Республикасының Бас прокуратурасы