Қазақстан Конституциялық Соты Конституциялық бақылау органдары еуразиялық қауымдастығына мүше конституциялық соттардың судьялары мен аппараттары қызметкерлерінің қатысуымен «Конституциялық бақылау органдарына азаматтардың өтініштері: жол берілу өлшемшарттары» тақырыбында онлайн-семинар ұйымдастырды. Семинардың модераторы – Конституциялық Соттың судьясы Сергей Ударцев, ал негізгі спикер ретінде Сот Аппаратының өтініштерді қабылдау және бастапқы қарау бөлімінің меңгерушісі Салтанат Нұрымбетова сөз сөйледі. Семинар барысында конституциялық соттардың жеке өтініштерді қарау тетіктері, оларға жол берілу шарттары, сондай-ақ олар бойынша қабылданған шешімдерді іске асыру тәртібі талқыланды. Нұрымбетова нысан мен мазмұнға қойылатын талаптарды сақтау мақсатында өтініштерді формальды белгілер бойынша алдын ала қарау бөлігінде Сот Аппаратының жұмысы туралы ақпаратпен бөлісті. Ол конституциялық бақылау органы өз қызметін бастаған сәттен бастап 8 мыңнан астам өтініш қабылдағанын, оның 99% - ы азаматтардың өтініштері құрайтынын атап өтті. Қазіргі уақытта Сот 52 нормативтік қаулы шығарды, оның шеңберінде қолданыстағы заңнаманың 70-ке жуық нормасы тексерілді. 12 норма конституциялық емес деп танылды, бұл нормалар шешімдер қабылданған сәттен бастап қолдануға жатпайды. Беларусь Конституциялық Сотының судьясы Т.В. Воронович, Тәжікстан Конституциялық Сотының судьясы К.М. Кәрімов және Қырғызстан Конституциялық Сотының судьясы М.Р. Бобукеева өз елдерінің конституциялық шағымды қарау тәжірибесімен бөлісті. Семинар Нархоз Университетінің базасында өтті.

Ақпарат көзі: Қазақстан Республикасының Конституциялық Соты