Қазақстанның елордасында Энергетика министрлігінің кеңейтілген алқа отырысы өтіп, онда ведомствоның 2024 жылға арналған жұмысының қорытындылары шығарылып, 2025 жылға арналған негізгі міндеттер белгіленді.

Отырысқа мемлекеттік органдардың, жергілікті атқарушы органдардың, қоғамдық бірлестіктердің, қауымдастырқтардың және басқа да мүдделі кәсіпорындардың өкілдері қатысты.

Қазақстан Республикасының Энергетика министрі Алмасадам Сәтқалиев қиындықтарға қарамастан 2024 жыл еліміздің отын-энергетика кешені үшін тұрақтылық пен үдемелі даму жылы болғанын атап өтті. Бірқатар бағыттар бойынша жоспарлы көрсеткіштерге қол жеткізіп, артығымен орындай алдық.

«2024 жыл біздің отын-энергетика кешенінің тұрақтылығы мен әлеуетін дәлелдеді. Біз алға қойған мақсаттарға жетіп қана қоймадық, сонымен бірге еліміздің энергетикалық қауіпсіздігін қамтамасыз етуге бағытталған болашақ серпінді жобалардың негізін қаладық», - деді Алмасадам Сәтқалиев.

Мұнай-газ саласында 2024 жылы ірі кен орындарында жоспарлы жөндеу жұмыстарын жүргізу қажеттілігіне, сондай-ақ халықаралық келісімдер бойынша уақытша шектеулерге қарамастан айтарлықтай нәтижелерге қол жеткізілді. Мұнай өңдеу жоспарланған 17,9 млн тоннаға жетіп, мұнай өнімдерін (14,5 млн тонна), сұйытылған газды (3 млн тонна) және мұнай-газ химиясы өнімдерін (540 мың тонна) өндіру жоспарланған көлемнен асып түсті. Мұнай өндіру 87,7 млн ​​тоннаны құрады.

2025 жылы Теңіз кен орнын кеңейту жобасын іске қосу және басқа да ірі кен орындарында, соның ішінде Қарашығанақ, Қаламқас-теңіз және Хазарда жұмыстарды жалғастыру арқылы 96,2 млн тонна мұнай өндіру жоспарланып отыр. Жер қойнауын пайдаланушылардың сатып алуларындағы қазақстандық қамту үлесі                                            61,9%-дан 62%-ға дейін ұлғайтылады. Аукциондар қорытындысы бойынша 2024 жылы 14 жер қойнауын пайдалану учаскесі сатылды және бұл жұмыс жалғасын табады.

Газ саласында өндіріс 2024 жылы 59 млрд м³ құрады, ал 2025 жылы 62,8 млрд м³ болады деп жоспарланады. Ішкі қажеттіліктерді қанағаттандыру үшін Қашаған мен Жаңаөзен қалаларында жаңа газ өңдеу зауыттары салынып жатыр, Жамбыл облысындағы «Барханная» кен орнын пайдалануға беруге дайындық жұмыстары жүргізіліп жатыр. Ел халқының 61,8%-ы газға қол жеткізді, газдандыру жұмыстары 2025 жылы ірі газ құбырлары мен газ тарату стансалары құрылысын аяқтай отырып жалғасады.

Электр энергетикасы саласында 2024 жылы энергия өндіру 117,9 млрд кВт/сағ құрады, оның 6,4% - ы жаңартылатын көздерден (7,58 млрд кВт/сағ) алынды. Жаңа объектілердің іске қосылуы «жасыл» энергия үлесін айтарлықтай арттырды. 2025 жылы жаңартылатын энергия көздерінің жалпы қуаты 455,5 МВт болатын тоғыз жаңа жоба жүзеге асырылады. Сондай-ақ жаңа дәстүрлі генерациялау қуаттарын (166 МВт) енгізу және жылу желілерін ауқымды жөндеу жоспарланып отыр.

Мұнай-газ химиясы өнеркәсібін дамыту басым бағыт болып қала береді.                             2024 жылы 540 мың тонна профильді өнім өндірілсе, 2025 жылы оның көлемін 550 мың тоннаға жеткізу жоспарланды. Атырау облысында қуаты 1 250 мың тонна полиэтилен шығаратын зауыт құрылысын бастау негізгі жобалардың бірі болмақ. Сонымен қатар                                               2024 жылы ірі жобаларды жүзеге асыруды және мотор майларына міндетті таңбалауды енгізуді көздейтін 2024 – 2030 жылдарға арналған индустрияны дамытудың жол картасы бекітілді.

Цифрландыру саланы басқару тиімділігін арттыру және барлық процестердің ашықтығын қамтамасыз етудегі маңызды қадам болды. 2024 жылы Энергетика министрлігінің Ахуалдық-талдамалық орталығы (АТО) іске қосылды, сондай-ақ мұнай-газ саласына мұнай жеткізу кестесін қалыптастыру, жанар-жағармай материалдарын бөлу және сұйытылған газды жеткізуді жоспарлауды қамтитын бірқатар цифрлық қызметтер іске қосылды.

Бұл жұмыс 2025 жылы да жалғасады. EnergyTech технологиялық платформасын енгізу аясында күзгі-қысқы кезеңге дайындық мониторингі жүйесін, мұнай өнімдері мен сұйытылған газдың барлық түрлерін таратудың бірыңғай цифрлық жүйесін, сондай-ақ ақпараттық жүйелерде жасанды интеллект элементтерін енгізу жоспарлануда. Бұл шаралар отын-энергетика кешеніндегі өндірістен ресурсты бөлуге дейінгі барлық процестердің ашықтығын, басқарылуын және тиімділігін арттыруға мүмкіндік береді.

«Министрлікке энергетикалық кешеннің тұрақтылығын сақтау және одан әрі өсуді қамтамасыз ету бойынша маңызды миссиясы жүктелді. Біздің міндет – алға қойған барлық мақсаттарды іске асыру, саланы неғұрлым технологиялық, экологиялық таза және азаматтардың мүдделеріне бағдарланған ету», - деп қосты Алмасадам Сәтқалиев.

Алқаны қорытындылай келе, Министр Министрлік еліміздің энергетикалық қауіпсіздігін қамтамасыз ету және азаматтардың әл-ауқатын арттыруға бағытталған міндеттерді орындау бойынша жұмысты жалғастыратынын атап өтті.

Алқа отырысы барысында «KEGOC» АҚ, «Самұрық-Энерго» АҚ, «QazaqGaz» ҰК» АҚ, «ҚазМұнайГаз» ҰК» АҚ және «Қазатомөнеркәсіп» ҰАК» АҚ сияқты негізгі ұлттық компаниялардың басшылары 2024 жылға арналған жұмыс қорытындылары туралы есептерін ұсынып, 2025 жылға арналған негізгі міндеттерді белгіледі.

Жиынға Қазақстан Республикасы Премьер-Министрінің бірінші орынбасары Роман Скляр, Президент Әкімшілігінің, Үкімет Аппаратының өкілдері, Парламент депутаттары, ұлттық компаниялардың, мұнай-газ және энергетика саласындағы ірі кәсіпорындардың басшылары, сондай-ақ қоғамдық ұйымдардың өкілдері мен сала ардагерлері қатысты.м

Ақпарат көзі: Министерство энергетики Республики Казахстан