Облыс әкімі Асхат Шахаровтың қатысуымен  өткен  облыстық мәслихаттың кезекті он бесінші сессиясында тұрғындарға көрсетілетін медициналық көмектің қолжетімділігі мен сапасы туралы мәселе қаралды.

Жиында алдымен баяндама жасаған облыстық денсаулық сақтау басқармасының басшысы Нұрбол Тымпиев бүгінде тұрғындар арасында жүрек-қан тамырлары және онкологиялық аурулармен сырқаттанушылықтың өсуіне байланысты профилактикалық мақсатта скринингтік тексерулер жүргізіліп жатқанын жеткізді.

Оның айтуынша, биыл 3319 адам қан айналым жүйесінің ауруларының артериялық гипертензиясы, 199 адамжүректің ишемиялық ауруы бойынша скринингтен өткен. Нәтижесінде 2278 тұрғын диспансерлік есепке алынған. Сондай-ақ биыл облыста қатерлі ісік ауруы 100 мың тұрғынға шаққанда 194,3 құрап, аурушаңдық деңгейі 7,0 пайызға төмендеген. Аурушаңдықтың азаю себебі облыс тұрғындарының көбеюімен байланысты.

Өз сөзінде басқарма басшысы өңірдегі кадрлар тапшылығы, «Дипломмен — ауылға» бағдарламасымен ауылға барған жас мамандарға берілген көтермеақы мөлшері, медициналық мекемелердегі қызмет сапасы мен ауылдардағы медициналық нысандардың құрылысы, т.б. мәселелерге тоқталып өтті.

«Облыста туберкулезбен ауыратындардың саны азайып отыр. Сондықтан 300 орындық осыған дейін салынған туберкулезге қарсы күрес диспансерінің ғимаратын 250 орындық жаңа онкологиялық орталық ретінде қайта даярлап, қолданысқа беруді ұсынамыз. Қазіргі таңда орталықта медициналық жабдықтардың да тозығы жеткен»

,  — деді Н.Тымпиев.

Сессияда облысқа жұмыс сапарымен келген Қазақстан онкология және радиология ғылыми-зерттеу институтының басшысы, Денсаулық сақтау министрлігінің штаттан тыс бас онкологі Диляра Қайдарова өңірдегі онкологиялық көрсеткіштер мен науқастардың сапалы ем алуы, онкологиялық орталықтағы құрал-жабдықтардың жағдайы мен медициналық ұйымдардың өзара бірлесе жұмыс істеуі жайында айтып берді.

Жиында медицина саласындағы мәселелерге қатысты облыс әкімі Асхат Шахаров аудандардағы медициналық мекемелердің жағдайы, дәрігерлердің жауапкершілігі мен қызмет көрсету сапасы жайлы пікірін білдірді.

«Мойындау керек, бұл мәселелерге келгенде кейде қаржыны игере алмаймыз, кейде қаржы жетпей жатады. Дегенмен біз бұл бағыттағы жұмыстарды үнемі назарда ұстап келеміз. Алдағы уақытта өңірде ядролық медицина орталығын салуда инвесторлар жағынан қызығушылық болса, біз қолдауға дайынбыз.  Ал онкологиялық көрсеткіштерге келсек, әрине, көңіл көншітпейді. Алдағы уақытта бұл мәселе бойынша жергілікті органдар бірлесе жұмыс істеуі тиіс», — деді өңір басшысы.

Отырыста депутаттар баяндамашыларға өз сауалдарын қойып, депутаттық сауалдарын жолдады.

«Бүгін көп мәселе қозғалды. Қазір қаржыны барлық салаға бөліп, жеткізіп жатырмыз. Биыл аяқталмаған жұмыстар келесі жылдары бюджетке енгізілетін болады. Ең алдымен, жоспарлау жұмыстары дұрыс болуы керек. Алдағы сессияда жылды қорытындылап, бюджет қаржысына өзгерістер енгіземіз. Қаламызда арықтар мен жол салу, ауыл халқын сумен, газбен қамту жұмыстары жүйелі түрде жалғасатын болады.

Келер жылы облыста өңдеу және қосымша білім беру саласын дамытуымыз керек. Бірінші бағыт бойынша кәсіпкерлік басқармасы арқылы жеңілдетілген несие механизмін енгізуіміз қажет. Ал қосымша білім беруде балаларға жан-жақты білім мен тәрбие беру тетігін қарастыруымыз керек», — деп облыс әкімі отырысты қорытындылады.

Ақпарат көзі: ГУ «Акимат Актюбинской области»