ҚР Стратегиялық жоспарлау және реформалар агенттігі (бұдан әрі – Реформалар агенттігі) ұйымдастырған дәріс аясында ҚР Президенті жанындағы Мемлекеттік басқару академиясының «Стратегиялық менеджмент және көшбасшылық» магистрлік курсының тыңдаушыларына мемлекеттік жоспарлаудың жаңартылған жүйесінің негізгі тәсілдері таныстырылды.

Реформалар агенттігі төрағасының орынбасары Олжас Төлеуовтың айтуынша, мемлекеттік жоспарлау жүйесінің архитектурасы биыл айтарлықтай өзгерістерге ұшырады.

Қолданыстағы жүйеге сәйкес иерархияның жоғарғы бөлігінде 2029 жылға дейінгі Ұлттық даму жоспары орналасқан, оны іске асыру тетіктері 3 бағытты қамтиды: мемлекеттік органдардың даму жоспарлары, облыстардың, республикалық маңызы бар қалалардың және Астананың даму жоспарлары, сондай-ақ ұлттық компаниялардың даму жоспарлары. 2029 жылға дейінгі Ұлттық даму жоспарының өзінде орта мерзімді пайымның құндылық бағдарларын белгілейтін бес принцип анықталды.

Спикер атап өткендей, тұрақты озыңқы өсу траекториясына шығу азаматтардың әл-ауқатының айтарлықтай өсуімен ұштасады, бұл нақты табыс пен өмір сүру сапасының артуымен байланысты.

«Осы мақсаттарға қол жеткізу үшін ҰДЖ бойынша жұмыс еліміздің барлық тұрғындарының базалық инфрақұрылым мен қызметтерге қолжетімділігін қамтамасыз етуге, әрбір азамат үшін тең мүмкіндіктер жасауға, сондай - ақ экономиканың базалық салаларын дәйекті дамытуға және озыңқы өсудің жаңа нүктелерін қолдауға бағытталатын болады», - деді Олжас Төлеуов.

Өз кезегінде тыңдаушылар жергілікті жерлерде міндеттерді іске асыру мәселелері бойынша өз тәжірибелерімен бөлісті. Қатысушылар Ұлттық даму жоспарын әзірлеушілерден түсіндірме алу мүмкіндігінің маңыздылығын атап өтті.

Іс шара соңында интерактив өткізіліп, онда барлық қатысушылар дәріс тақырыбы бойынша өз сұрақтарына толық жауап алды.

Ақпарат көзі: Қазақстан Республикасының Стратегиялық жоспарлау және реформалар агенттігі