«ТАЗА ҚАЗАҚСТАН»: ҚАРАҒАНДЫ СТУДЕНТТЕРІ ҚАЛДЫҚСЫЗ ТЕХНОЛОГИЯЛАРДЫ ҰСЫНАДЫ

27 ақпанда Е.А.Бөкетов атындағы Қарағанды зерттеу университетінде Е.А.Бөкетовтің 100 жылдығына орай және «Таза Қазақстан» идеологемасын жүзеге асыру мақсатында «Қалдықсыз технология» атты ғылыми-тәрбиелік сайыс өтті.

Іс-шараға қалдықтарды азайту, қайта өңдеу және өндіріске экологиялық таза технологияларды енгізу бойынша инновациялық шешімдерді ұсынған университеттер мен колледж студенттері жиналды.

Заманауи сын-қатерлер батыл шешім қабылдауды талап етуде, ал қарағандылық студент жастар экология туралы жай ойлап қана қоймай, өзгерістердің нақты тетіктерін ұсынуға дайын екенін дәлелдеді. Ұсынылған жобалар қалдықтарды қайта өңдеудің жаңа әдістерін әзірлеу, оларды кәдеге жаратудың баламалы технологияларын енгізу мен ресурстарды қайта пайдалану сияқты кең ауқымды мәселелерді қамтыды.

Әрбір жұмыс ғылыми тереңдігімен, шығармашылығы және практикалық бағытымен ерекшеленді. Өндірістің әртүрлі кезеңдері мен күнделікті өмірде қалдықтарды барынша азайтудың тиімді жолдарын іздеуге ерекше назар аударылды.

«Қалдықсыз технология» байқауының жеңімпаздары:

І орын мен 25 000 теңге жүлдені Қарағанды индустриалды-технологиялық колледжінің студенттері жеңіп алды.

ІІ орынды және 20 000 теңге жүлдені Қарағанды жоғары гуманитарлық колледжі және Қарағанды көлік технологиялар колледжі командалары бөлісті.

ІІІ орын және 15 000 теңге жүлде Қарағанды университеті химия факультетінің студенттеріне бұйырды.

Барлық сайыс қатысушылары экологиялық бастамаларды дамытуға қосқан үлестерін растайтын сертификаттарға ие болды. Бұл жастардың тұрақты даму саласында жаңа зерттеулер жүргізуге ынта береді.

Ақпарат көзі: Қазақстан Республикасы Ғылым және жоғары білім министрлігі