Бүгін Мәжілістің Экология және табиғатты пайдалану мәселелері жөніндегі комитетінің тақырыптық отырысында ТЖ министрі генерал-майор Шыңғыс Әрінов  ТЖМ қызметі мен даму жоспарлары туралы айтты.

  Министр мәжілісмендер алдындағы өз сөзінің басында қазіргі уақытта Министрліктің қызметі «теориядан практикаға» көшуге бағытталған, осыған байланысты халықты төтенше жағдайлардан қорғауды арттыру бойынша шаралар кешені қабылданатынын атап өтті.

  «Биыл Мемлекет басшысының тапсырмасы бойынша Төтенше жағдайлардың алдын алу комитеті құрылды. Судағы табиғи және техногендік сипаттағы төтенше жағдайларға жедел ден қою үшін алғаш рет «Теңіз жасағы» және ТЖ аймақтарында гуманитарлық жүктерді қорғауға арнайы мақсаттағы «Айбат» бөлімшесі құрылды. Министрлікте төтенше жағдайларды болжау, модельдеу және талдау үшін заманауи цифрлық жүйелерімен жабдықталған Командалық орталық құрылды. Сонымен қатар төтенше жағдайлар кезінде жедел ден қою үшін барлық өңірлердегі аумақтық бөлімшелерді бірыңғай басқару органына біріктіру бойынша ұйымдастыру-штаттық іс-шаралары жүргізіліп жатыр»,- деп Шыңғыс Әрінов атап өтті.

  Алматы, Орал, Өскемен және Қостанай қалаларында қауіпсіздікті нығайту үшін ТЖМ әскери бөлімдері есебінен құтқару батальондары жасақталды, бұл төтенше жағдайларды жедел жоюға және қаржылық шығыстарды қысқартуға мүмкіндік берді.

  Өртке қарсы қызмет комитетіне қадағалау функциялары қайтарылды, бұл қауіп-қатерлерге жедел ден қоюға және еліміздегі өрт қауіпсіздігін біртіндеп жақсартуға мүмкіндік береді.

  Басты назар табиғаттағы тұтану ошақтарын ертерек анықтауға және  өрттердің алдын алуға аударылды. Мәселен орман қорын тәулік бойы бақылау үшін Командалық орталықта «Орман» және «Табиғат» бейнебақылау жүйелері қосылды. Сонымен бірге найзағай қаупі мен термалды нүктелер туралы мәліметтер талданды, ал өрт анықталғанда оны сөндіру үшін жедел шешім қабылданды. Өңірлерде Министрліктің бөлімшелері ұшқышсыз ұшу аппаратары арқылы аэровизуалды барлау жүргізілуде.

  Сондай-ақ биылғы жылы ұшқышсыз ұшу аппаратары сел жағдайын бақылау кезінде де кеңінен қолданылды. Олардың көмегімен Алматы облысы мен Алматы қаласында Қазселденқорғау бөлімшелері 6 аса қауіпті мұздақ көлді босатты, сол арқылы қауіп жойылды.

  Мемлекет басшысының тапсырмасы бойынша сейсмикалық қауіпсіздікті қамтамасыз ету тәсілдері қайта қаралды. Бірінші кезекте халықты хабарландыру және жер сілкінісі кезіндегі іс-әрекеттерді оқыту жүйесі пысықталды. Келешекте сейсмологиялық станциялар желісін жаңғыртып, кеңейтеміз,- деп ТЖМ басшысы атап өтті.

  Алматыда Министрліктің жедел мақсаттағы «Алатау» оңтүстік базасы құрылды. Оның аумағында жойқын жер сілкінісі болған жағдайда зардап шеккендерге арналған шатырлы қала орналастырылады, алаң дайын.

  Министрлік бөлімшелерінің материалдық-техникалық жарақтандыру тәсілдері қайта қаралды. Өрт сөндірушінің жауынгерлік киімі жақсартылды. Енді оның салмағы жеңілірек, бұл құтқару жұмыстарын орындауға ыңғайлы. Сапасы жоғарлап, сыртқы факторларға төзімді етіп жасалған.

  Өрт сөндіру бөлімдерін салу тәсілі қайта қаралды. Тамыз айында елордада жатақханасы бар бірегей өрт сөндіру бекеті ашылды, ол 3,5 айда заманауи технологияларға сай жылдам құрастырылатын конструкциялардан салынды. Осыған ұқсас «құрылыс генокоды» барлық өңірлерде енгізілетін болады.

  Жалпы республика бойынша 432 өрт сөндіру бөлімі бар, 121 өрт сөндіру депосын салу қажет. Сондай-ақ қаржыны үнемдеу есебінен өз күшімізбен өрт сөндіру бөлімдеріне жөндеу жұмыстары жүргізіліп, аумақ абаттандырылуда.

  Өз баяндамасының соңында министр әлеуметтік қолдауды жақсарту шеңберінде төтенше жағдайлар қызметкерлеріне тұрғын үй төлемдерін төлеу мәселесі шешіліп жатқанын атап өтті. Төлемдер келесі жылдан бастап бірінші кезекте өрт сөндірушілерге және жекелеген санаттарға көзделген.

Ақпарат көзі: Министерство по чрезвычайным ситуациям Республики Казахстан