Алматыдағы Десанттық-шабуылдау бригадасында экс-қорғаныс министрі генерал-полковник Әлібек Қасымовпен кездесу өтті. 

Салтанатты шараға әскери қолбасшының серіктері, жеке құрам, олардың отбасылары, «Жас сарбаз» әскери-патриоттық қозғалысының тәрбиеленушілері, мерейтой иесінің туған-туыстары қатысты. 

Кездесу ашық диалог форматында өтті. Жас сарбаздықтардың бірі генералдан құрдастары оны балалық шағында қалай атағаны туралы сұрады.

– «Шатырдағы скрипкашы» дейтін, өйткені бір кездері скрипка сыныбында оқыдым, бұл өнерге 12 жылымды арнадым, – деп күлімсіреп жауап берді Әлібек Хамитұлы.   

Кешке қатысқан Қарулы күштердің ардагерлері Қазақстан тәуелсіздігінің алғашқы жылдарында қорғаныс ведомствосындағы бірлесіп атқарған қызметтері жайлы естеліктерін еске алды. Олар Кеңес Одағының Батыры, тұңғыш қорғаныс министрі, Халық қаһарманы армия генералы Сағадат Нұрмағамбетов пен оның бірінші орынбасары – Қарулы күштер Бас штабының бастығы генерал-полковник Әлібек Қасымовтың елеулі еңбектерін атап өтті. Әлібек Хамитұлы қорғаныс министрлігіне Сағадат Қожахметұлынан кейін басшылық жасады. 

– Өткенге көз жүгіртіп, атқарған игі істерге риза боламын, – деді мерейтой иесі. – Сол қиын да күрделі уақытта бізге Қарулы күштерді, офицер кадрларды, техника мен қару-жарақты сақтап, оларды одан әрі дамыту қажет болды.

Генерал-полковник Ә. Қасымовтың басшылығы кезінде қорғаныстың тиімді жұмыс істеуі үшін әскери округтер құрылып, инфрақұрылым жасалды. Әскерлерді жасақтаудың аралас жүйесіне көшу жүзеге асырылды. Елдің Әскери-теңіз күштері құрылып, отандық корабль жасаудың негізі қаланды. Қарулы күштердің Кадет корпусы ашылды. Кәсіби сержанттарды даярлау басталды. Бүгінде олар әскер сапында жүріп, офицерлерге жеке құрамды жауынгерлік даярлау мен тәрбиелеу ісінде елеулі көмек көрсетеді. Қазақстанның Азаматтық авиация академиясы жанындағы Ақтөбе жоғары әскери авиация училищесі мен инженерлер факультеті ашылды. Алыс шетелде офицер кадрларды даярлау жолға қойылған. Әскери қызметті өткеруді реттейтін заң шығарушы база құрылды. Бұл Әлібек Хамитұлының тікелей қатысы бар ведомство қызметінің кейбір тармақтары ғана.          

Кездесуге қатысушылар туған күн иесіне жылы лебіздерін жеткізіп, қошеметтеп, тамаша көңіл күй сыйлады. Десанттық-шабуылдау әскерлерінің қолбасшысы генерал-майор Алмаз Жұмакеев мерейтой иесіне Қорғаныс министрінің атынан құттықтау хатын табыс етті. Ал Алматыдағы Десанттық-шабуылдау бригадасының шығармашылық ұжымы оның сүйікті әндерін шырқады.

Ақпарат көзі: Министерство обороны Республики Казахстан