Астанада Қазақ тілі бойынша "Жарқын болашақ" республикалық шығармашылық байқауының қорытындысы шықты. Онда Қарағанды облысының үш оқушысы білім грантына ие болды.

Байқау бес бағыт бойынша өтті: «Бейнелеушілер», «Білгірлер бəйгесі», «Жас қаламгер», «Сөз шеберлері», «Əнші-бұлбұлдар». Оған еліміздің әр өңірінен 5 мыңнан астам оқушы қатысты. Финалға 200-ге жуық бала өтті. Олимпиадада ең жоғары нәтиже көрсеткен 30-дан астам мектеп түлегі білім грантын алды.

Олардың қатарында Ш.Құдайбердиев атындағы Қарағанды мектебінің оқушысы Аружан Үндікерова, Бұқар Жырау ауданы С. Торайғыров атындағы тірек мектебінің түлегі Айзере Әбуова және Теміртау қаласының № 31 жалпы білім беретін мектебінің он бірінші сынып оқушысы Елизавета Федорова бар. Қыздар Торайғыров атындағы Павлодар университетінің, Алматыдағы Қ. Сәтбаев атындағы Қазақ ұлттық ғылыми-техникалық университетінің және Х. Досмұхамедов атындағы Атырау университетінің гранттарына ие болды.

– Мен "Бейнелеушілер" бағытына қатыстым. Бізге қазақ авторларының үш туындысын таңдауға мүмкіндік берді, олардың бірінің сюжетіне комикс түрінде иллюстрациялар салу керек болды. Мен Мұхтар Әуезовтің "Көксерек" туындысын таңдап, Х. Досмұхамедов атындағы Атырау университетінде, дизайн және бейнелеу өнері факультетінде оқуға грант жеңіп алдым. Өз нәтижеме ризамын. Бірақ ҰБТ да тапсырамын, – дейді Елизавета.

Сондай-ақ, облыс оқушылары жүлделі орындарға ие болды. "Жас қаламгер" номинациясы бойынша үшінші орынды Саран қаласының № 16 ЖББМ 9-сынып оқушысы Айғаным Әлімхан жеңіп алды. "Әнші бұлбұлдар" санатындағы вокалдық деңгейі үшін № 48 ЖББМ 7-сынып оқушысы Еркеназ Жүнісова үшінші орын алды. "Сөз шеберлері" номинациясы бойынша екінші орынға дарынды балаларға арналған мамандандырылған Н.Нұрмақов мектебінің оныншы сынып оқушысы Сабина Марланқызы және Қарағанды № 2 лицейінің 10-сынып оқушысы Даная Корытникова ие болды.

– Менің ана тілім-орыс тілі, бірақ мұғалімнің қолдауы мен күш-жігерімнің арқасында мен қазақ тілін жетік білемін. Олимпиада қиын болған жоқ, бірақ ауыл мектептерінде оқитын бәсекеге қабілетті балалар көп болды. Онда тіл білетін орта жақсы, ол да нәтижеге әсер етеді. Бірақ мен екінші орынға ие болғаныма ренжіген жоқпын. Келесі жылы грант ұтып алуға мүмкіндігім бар, – деді Даная.

Қазақ тілінен "Жарқын болашақ" республикалық олимпиадасы биыл 12-ші рет өтуде. Оны Қазақстан Республикасы Білім Министрлігінің қолдауымен "Білім-инновация" халықаралық қоғамдық қоры және "Дарын" РҒПО ұйымдастырды.

Ақпарат көзі: ГУ «Аппарат акима Карагандинской области»