«Жас сарбаз» балалар-жасөспірімдер әскери-патриоттық қозғалысының елорда филиалы қалалық жастар саясаты мәселелері басқармасының қолдауымен мектеп оқушыларына «НВП ағай» фильмінің көрсетілімін ұйымдастырды.

Іс-шара Қарулы күштердің Ұлттық әскери-патриоттық орталығында өтті.

Оқушыларға арнаған сөзінде «Жас сарбаз» әскери-патриоттық қозғалысы Астана қалалық филиалының төрағасы Асхат Налшыбек Отан қорғаушы миссиясына дайындықтың маңыздылығын атап өтті.

 – Бүгін өздерің тамашалаған «НВП ағай» фильмі нағыз патриоттың қандай болуы керегін түсінуге мүмкіндік береді деп ойлаймын, – деді ол.  

Көрсетілімнен соң балалар кейіпкерлер туралы өз әсерлерін бөлісті. Олардың әрқайсысының өзіндік өмірлік көзқарасы мен өзіндік түсінігі бар.  

Іс-шара барысында Instagram әлеуметтік желісіндегі «Жас сарбаз» қозғалысының парақшасына жаңадан тіркелушілер арасында ұтыс ойыны ұйымдастырылып, жеті жеңімпазға сыйлық табыс етілді.

Елорда оқушылары да Көшпенділердің дүниежүзілік ойындарын қызығушылықпен қадағалауда. Көрсетілім соңында дүбірлі додаға қатысып жатқан қазақстандық спортшыларды қолдау туралы ұсыныс түсті. Осы мүмкіндікті пайдаланған жас патриоттар оларға ізгі тілектер тілеген бейнежазба жолдады.

Ақпарат көзі: Министерство обороны Республики Казахстан