Жақын болашақта Қазақстан мен Тәжікстан екі ел арасындағы сауда айналымын жылына 2 млрд. долларға жеткізуді көздеп отыр. Президент Эмомали Рахмонның 2023 жылдың тамыздағы Қазақстанға сапары барысында Мемлекет басшылары қазақ-тәжік үкіметтерінің алдында осындай тапсырманы қойған болатын. ҚР Сауда және интеграция министрі Арман Шаққалиевтің Душанбеге жұмыс сапары барысында осы тапсырманы жүзеге асырудың нақты қадамдары жан-жақты талқыланды.

Қазақстан – Тәжікстанның төртінші ірі сауда серіктесі.Бірақ бұған тоқмейлсіп отырмай, осы бағытта өсудің ресурстарын пайдаланған жөн. Атап айтқанда, Тәжікстанның жеміс-көкөнісін Қазақстанға экспорттау , энергетикалық ресурстар, тыңайтқыштар, сондай-ақ Тәжікстанда сұранысқа ие картоп және басқа да бірқатар азық-түлік өнімдері бойынша мүмкіндіктер бар. Тәжік тарапын Қазақстаннан инвестиция тарту мәселесі де қызықтырады.

Душанбеге жұмыс сапары барысында Арман Шаққалиевтің Тәжікстанның ауыл шаруашылық, экономикалық даму және сауда министрлерімен, Тәжікстанның мемлекеттік материалдық резевтер бойынша агенттік директоры, үкіметі жанындағы экспорт бойынша агенттігінің директорымен және "Тәжік темір жолы" мемлекеттік унитарлық кәсіпорнының бастығымен кездесулері өтті.

Екі жақты және көпжақты кездесулер барысында қазақ министрі тәжікстандық әріптестерінің алдында екі елдің сауда қатынасының өсу жолдарын айтты. Маусымаралық кезеңде Қазақстан нарығына Тәжікстанның ауылшаруашылық өнімдерін жеткізу көлемі артты. Тәжікстан қазірдің өзінде Павлодар және Ақмола облыстарына өз өнімін әкеліп, сатып жатыр.

Өнімді үздіксіз жеткізіп отыру үшін кедендік рәсімдеу, сауда баждары және теміржол транзиттік шығындары сияқты бірқатар мәселелерді пысықтау қажет.

Бұл орайда Қазақстанның сауда және интеграция министрі Арман Шаққалиев пен Тәжікстанның Экономикалық даму және сауда министрі Завки Завкизода 2024 жылдың соңына дейін Қазақстан мен Тәжікстан елдері арасындағы тауар айналымын ұлғайту жөніндегі Жол картасын іске асыру бойынша нақты қадамдар жасауға келісті.

Ал Тәжікстанның Ауыл шаруашылық министрі Курбон Хакимзодамен келіссөздер барысында Арман Шаққалиев Қазақстанның барлық қалаларында маусымаралық кезеңде салыстырмалы түрде арзан бағамен Тәжікстанның өнімдері ұсынылған ауыл шаруашылық жәрмеңкелерді өткізуді ұсынды. Онда жаңа піскен пияз, картоп, қырыққабат және басқа да күнделікті сұранысқа ие өнімдерді шығаруға болады. Бұл қадам да сауда көлемін ұлғайтуға мүмкіндік береді.

Өз кезегінде Курбон Хакимзода Тәжікстан экспортының құрылымында жемістер мен көкөністер және кептірілген жемістер ерекше орын алатынын айтты. Сондай-ақ, 2023 жылдың соңына дейін Тәжікстаннан Қазақстанға 142 мың тоннадан астам жеміс-жидек пен көкөніс жіберілгенін де атап өтті.

«Тәжікстанның 2024 жылға арналған экспорттық әлеуеті 80 мың тоннадан астам жаңа піскен жеміс, 100 мың тонна кептірілген жеміс және 200 мың тонна сапалы ерте пиязды құрайды», - деді министр.

Мемлекеттік материалдық резервтер агенттігінің директорымен , Тәжікстан Үкіметі жанындағы Экспорт бойынша агенттігінің директорымен және Тәжік темір жолы" мемлекеттік унитарлық кәсіпорнының бастығымен өткен кездесу бірқатар нақты келісімдермен аяқталды.

Мемлекеттік материалдық резервтер агенттігінің директоры Нурмахмад Ахмадзодамен келіссөздер барысында Тәжікстаннан Қазақстанға ауыл шаруашылығы өнімдерін жеткізу үшін автомобиль көлігін жеңілдікпен пайдалану мүмкіндігі, сондай-ақ ҚР Сауда және интеграция министрлігі тарапынан Қазақстанға қажетті тапсырыстың болжамды көлемін құруда жеткізуді жоспарлау және жемістер мен көкөністерге зиян келтірмеу шараларын қамту айтылды.

Сондай-ақ, тараптар сұранысты анықтау және өнімдерді арнайы шарттармен жөнелту және сақтау, тәжік өнімдерін Қазақстан арқылы үшінші елдерге экспорттау мүмкіндігі бар көтерме тарату орталықтарын құру және өзара тиімді ынтымақтастықтың басқа да аспектілері мәселелерін зерделеуге келісті.

Ақпарат көзі: Министерство торговли и интеграции Республики Казахстан