Көршілес Қырғызстанда өтіп жатқан Жедел әрекет ету ұжымдық күштерінің «Өзара іс-қимыл» командалық-штабтық оқу-жаттығуы, барлау күштері мен құралдарының «Іздеу» арнайы және материалдық-техникалық қамтамасыз ету әскерлерінің «Эшелон» оқу-жаттығулары аяқталды. 

Бірлескен маневрлерге қазақстандық әскерилер, оның ішінде Десанттық-шабуылдау әскерлерінің әскери қызметшілері өз техникасымен және қару-жарағымен белсене қатысты. Оқу-жаттығудың белсенді кезеңін ҚР Қарулы күштері Десанттық-шабуылдау әскерлерінің қолбасшысы генерал-майор Алмаз Жұмакеев бақылады.

Оқу-жаттығудың жабылу салтанатында ҰҚШҰ Бас хатшысы Иманғали Тасмағамбетов іс-шараларды сапалы іске асырғаны үшін Қырғызстанның қорғаныс ведомствосы мен Ыстықкөл облысының басшылығына алғысын білдірді.  

Ол гибридті сипаттағы қазіргі дағдарыстар және оларды шешу арнайы тәсілдерді қажет ететіндігін байқатып отыр деді. Ұйымның Бас хатшысы оған қоса ҰҚШҰ жауапкершілік аймағына тікелей іргелес бірқатар өңірлерде қақтығыс әлеуетінің артуы жағдайында біздің елдеріміз әскери қауіпсіздікті қамтамасыз ету тетіктерін жетілдіру және қазіргі заманғы сын-тегеуріндер мен қауіп-қатерлерге қарсы тұру үшін әлеуетті арттыру жөнінде қажетті шаралар қабылдап жатқанын атап өтті. 

– Оқу-жаттығулар ҰҚШҰ Ұжымдық күштерінің ұжымдық және ұлттық қауіпсіздікке төнетін қатерлерге ден қою дайындығының деңгейі жоғары екенін көрсетті. Командирлер мен штабтар бөлімшелерді басқарудың жоғары дағдыларын байқатты, ал жеке құрам өзара іс-қимыл мен үйлесімділікті жақсы көрсетті, – деп түйіндеді ҰҚШҰ Бас хатшысы. 

Оқу-жаттығу ҰҚШҰ күш-құралдарын таулы-шөлді жерлерде және Ыстықкөл көлінің акваториясында жоспарлау және қолдану мәселелерін тәжірибелік пысықтауды қамтыды. ҰҚШҰ-ға мүше мемлекеттердің бөлімшелерімен бірлесіп жұмыс істеуге, сондай-ақ қару-жарақ пен техниканың заманауи үлгілерін пайдалануға ерекше назар аударылды. 

Оқу-жаттығуларға барлығы 1500-ге жуық әскери қызметші мен 300-дей қару-жарақ, әскери және арнайы техника жұмылдырылды.

Ақпарат көзі: Министерство обороны Республики Казахстан