Конституциялық сотта Германияның халықаралық құқықтық ынтымақтастық қоры (IRZ) мен Maqsut Narikbayev University қолдауымен судьялардың құқық саласындағы неміс сарапшыларымен сараптамалық кездесуі өтті.

Конституциялық Сот Төрағасының орынбасары Бақыт Нұрмұханов Қазақстанның конституциялық бақылау органының қызметіне шолу жасап, халықаралық өзара іс-қимыл мен құқықтық тәжірибе алмасудың маңыздылығын атап өтті. Ол осы кездесуді ұйымдастырғаны үшін серіктестерге алғысын білдірді.

Солтүстік Рейн-Вестфалия Әділет министрлігінің басқарушы министериалраты доктор Кристиан Райтемайер заңдағы іс-қимыл еркіндігі туралы неміс тәжірибесін ұсынды, ал адвокат доктор Кристиан Шайх Германия Конституциясы шеңберінде жеке адамның бостандығын қорғау тақырыбын қозғады.

Шараға қатысушылар құқық үстемдігінің өзекті мәселелерін талқылады, Германияның сот практикасының мысалдарын талдады және құқық қолдану практикасын жақсарту бойынша пікір алмасты.

Талқылауға сонымен қатар IRZ жобалар менеджері Лариса Викленко және Maqsut Narikbayev University Әкімшілік және неміс құқығы ғылыми мектебінің директоры Роман Мельник қатысты.

Ақпарат көзі: Қазақстан Республикасының Конституциялық Соты