Негізгі ҰБТ-ға өтініштерді қабылдау 12 сәуірде басталады
Негізгі ҰБТ-ға өтініштерді қабылдау 12 сәуірде басталады
Негізгі ҰБТ-2025-ке қатысу үшін өтініш қабылдау 12–25 сәуір аралығында өтеді. Биыл барлық талапкерлерге грант байқауына қатысуға ең жақсы нәтижені таңдай отырып, негізгі ҰБТ-ны екі рет тапсыруға мүмкіндік беріледі.
12–18 сәуір аралығында өтінішті бір рет беруге болады. Ал 19–25 сәуір аралығында – бір немесе екі рет өтініш тапсыру құқығы беріледі. Тестілеудің өзі 16 мамыр мен 5 шілде аралығында өтеді.
ҰБТ-ға қатысуға өтінімдер онлайн – Ұлттық тестілеу орталығының сайтында https://app.testcenter.kz/auth немесе UTO.kz қосымшасы арқылы қабылданады. Талапкерлер тестілеу күнін, уақытын және пунктін өздері таңдайды. Бұл ретте бейінді пәндердің комбинациясы екі талпыныста да бірдей болады.
ҰБТ-дағы пәндердің саны бұрынғыдай: үш міндетті және екі таңдау пәні. Барлығы 120 тапсырма: 20 – Қазақстан тарихы бойынша, 10 – оқу сауаттылығы бойынша, 10 – математикалық сауаттылық бойынша және екі бейінді пән бойынша 40 сұрақтан келеді. Балдардың ең көп саны – 140.
Тестілеу уақыты – 4 сағат (240 минут). Ерекше білім беру қажеттіліктері бар балалар үшін қосымша уақыт – 40 минут қарастырылған.
Академиялық адалдықты қамтамасыз ету мақсатында ҰБТ-ның әрбір қатысушысы жеке-дара жасалған тест нұсқасын алады. Тестілеу кезінде калькулятор, химиялық элементтердің кезеңдік жүйесі және тұздардың ерігіштігі кестесі қол жетімді. Қажет болған жағдайда кестелердің нұсқалары қағаз түрінде ұсынылады.
Тестілеу аяқталғаннан кейін 30 минут ішінде апелляция беруге болады. Нәтижелері бар сертификат апелляция қаралғаннан кейін жеке кабинетінде қолжетімді болады.
Оқуға түсу үшін шекті балдар бұрынғыша қалады:
«Құқық» және «Педагогикалық ғылымдар» – кемінде 75 балл;
«Денсаулық сақтау және әлеуметтік қамсыздандыру (медицина)» – кемінде 70 балл;
Ұлттық жоғары оқу орындарына – кемінде 65 балл;
басқаларға – кемінде 50 балл.
Тестілеу пункттерінің кіреберістерінде қол және рамалық металл іздегіштер, ал аудиторияларда – ұтқыр және радиоэлектрондық байланыс сигналдарын басу құрылғылары мен бейнебақылау камералары пайдаланылатын болады. ҰБТ аяқталғаннан кейін бейнежазбаларды талдау 31 қазанға дейін жүргізіледі. Бұзушылықтар анықталған жағдайда ҰБТ нәтижелері жойылады.
Ұлттық тестілеу орталығының ақпараты бойынша
Ақпарат көзі:
Біздің Telegram арнамызға жазылыңыз және барлық маңызды оқиғалардан хабардар болыңыз, мына сілтеме -
