Облыс әкімі Берік Уәли ауданға жұмыс сапары барысында Ақтоғай ауылындағы әлеуметтік нысандарды аралады. Аймақ басшысы елді мекендегі дәрігерлік амбулаторияның жұмысымен танысты. Медициналық мекеме бір ауысымда 85 адамды қабылдай алады. Бүгінде мұнда 6 мыңға жуық тұрғын тіркелген. 1989 жылы пайдалануға берілген нысанда 50-ге жуық адам еңбек етеді. Аягөз ауданында қазіргі таңда 7 медицина қызметкері жетіспейді. Ақтоғай дәрігерлік амбулаториясында хирург, невропотолог, кардиолог мамандары тапшы. Аудан әкімдігі мәселені шешу үшін тиісті жұмыстарды жүргізуде.Қазіргі таңда аудан орталығындағы ауруханада 8 резидент жұмыс істеп жатыр. Аймақ басшысы осы бағыттағы жұмысты жандандыру қажеттігін айтты. Аудан әкіміне кадр мәселесін Денсаулық сақтау басқармасымен бірлесе отырып шешу жолдарын қарастыруды тапсырды."Шалғайдағы ауыл тұрғындары сапалы медициналық қызмет алуы керек. Сондықтан кадр тапшылығы мәселесін Семей медицина университетімен бірлесе шешу қажет. Ал дәрігерлік амбулаторияның материалдық-техникалық базасын кезең кезеңімен жаңғыртамыз" деді облыс әкімі.

АБАЙ ОБЛЫСЫ ӘКІМІНІҢ БАСПАСӨЗ ҚЫЗМЕТІ

Ақпарат көзі: Абай облысының әкімдігі