Тағы бір жақсы жоба Қарағанды қаласының отбасын қолдау орталығында басталды. "Білім-инновация" лицей-интернаты мен Н. Нұрмақов атындағы мамандандырылған мектеп-интернатының үздік оқушыларынан құралған Peer To Peer еріктілер тобы әлеуметтік осал отбасылардан шыққан балаларды тегін оқытатын болады.

– Біздің жобаның мақсаты-көпбалалы және аз қамтылған отбасылардағы балаларға тегін қосымша білім беру. Ата-аналар біздің еріктілерден көмек сұрай алады, ақылы оқытушыларды жалдамайды. Біздің жоба алғашқы қадамын сәуір айында онлайн режимінде жасады. Қазір жобамызда Қазақстан бойынша 112 ерікті бар. Олардың көпшілігі-еліміздің түкпір-түкпірінде орналасқан "Білім-инновация" лицей-интернаттарының оқушылары. Бүгін отбасын қолдау орталығы бізге оқу аудиторияларын ұсына отырып, офлайн режимінде жұмыс істеуге мүмкіндік берді, – деді "Білім-инновация" лицей-интернатының 10-сынып оқушысы Дарина Аданова.

Peer To Peer жобасының еріктілері әлеуметтік мәртебесіне қарамастан республика бойынша барлық оқушыға қосымша білім беруге дайын. Қарағандыда елу оқушы өз білімімен бөліседі. Сабақтар отбасын қолдау орталығының ғимаратында өтеді.

– Peer To Peer жобасының еріктілері-халықаралық және республикалық олимпиадаларда жүлделі орындарға ие болған үздік, дарынды оқушылар. Жазғы демалыста олар балаларға мектеп бағдарламасын меңгеруге көмектеседі. 1-ші және 9-шы сынып оқушыларына математика, қазақ және ағылшын тілі, физика, химия және басқа пәндер бойынша бағдарламаны тереңдетіп оқуға көмектеседі, – дейді Peer To Peer жобасының тағы бір қатысушысы – Адина Абсадыкова.

Офлайн сабақтар 1 маусымда басталады. Әзірге еріктілер қосымша білім алғысы келетіндерді тіркеп, ата-аналарымен бірге кесте жасауда.

«Ата-аналарға тіркелу үшін сауалнама беріледі. Сауалнамада олар баласының қандай пәндерді терең және қай уақытта оқығысы келетінін көрсетеді. Офлайн сабақтар жаз бойы өткізіледі. Ал онлайн сабақтарды кем дегенде 2 жыл жалғастыруды жоспарлап отырмыз. Біздің қосымша сабақтарымыздың тағы бір ерекшелігі – әр балаға жеке ерікті беріледі. Біз өз білімімізді басқалармен бөлісу арқылы елімізде білімге деген қызығушылықты арттырғымыз келеді», – деп атап өтті еріктілер.

Қосымша сабақтар білім алушылардың қалауы бойынша қазақ және орыс тілдерінде өткізілетін болады.

Жоба туралы толығырақ мына телефондар арқылы білуге болады: +7-705-984-04-64 (Дарина Алданова), +7-700-976-71-29 (Адина Садықова), сондай-ақ Instagram @peer2peer_volunteers және @otbasy.ortalygy.krg.

Ата-аналарға сілтеме: https://docs.google.com/forms/d/e/1FAIpQLSeMIucQCvgsntaB-9NZZL8wgE6pZQTbqAJ6OSks0BY2Zq0XSg/viewform.

Отбасын қолдау орталығы Қарағанды қаласы, Чкалов көшесі, 7 мекенжайында орналасқан.

Ақпарат көзі: ГУ «Аппарат акима Карагандинской области»