QYZPU ОҚУ ҒИМАРАТЫНА ҰЛАҒАТТЫ ҰСТАЗ КҮЛӘШ ҚҰНАНТАЙҚЫЗЫНЫҢ АТЫ БЕРІЛДІ

  11 қазан күні Қазақ ұлттық қыздар педагогикалық университетінің оқу ғимаратына Күләш Құнантайқызының аты берілу салтанаты және дәрісхананың ашылуы өтті.

  Күләш Құнантаева – Қазақстан әйелдері арасынан шыққан тұңғыш педагогика ғылымдарының докторы, академик. Отандық педагогика ғылымының дамуына сүбелі үлес қосқан көрнекті ғалым және ұлағатты ұстаз құрметіне «Қазақстандағы білім саласында әйелдердің рөлі» тақырыбында конференция өткізілді. Конференция аясында ғалымның өмірі мен ғылыми қызметі туралы баяндама жасалды.

  Іс-шара барысында ҚР Ұлттық ғылым академиясының және ҚР Педагогика ғылым академиясының құрметті академигінің жетістіктері, фотосуреттері, құжаттары мен ғылыми жұмыстары ұсынылған көрме ұйымдастырылды. Университет ректоры Гүлмира Қанай Күләш Құнантайқызының қазақ әйелдерінің жоғары білім алуы жолындағы зор еңбегін атап өтті.

  «Күләш Құнантайқызының қазақ әйелдерінің жоғары білім алуы жолында сіңірген еңбегі зор. Ол кісінің тікелей ықпалымен әйелдер білімінің дамуы және Қазақстанда білім беруді дамыту туралы 400-ден аса ғылыми еңбек жарық көрді. Олардың арасында оқу құралдары, оқулықтар және монографиялар бар. Күләш Құнантаеваның жетекшілігімен ғылым кандидаттары мен докторлар даярланды. Қазіргі уақытта да «Құнантаеваның ғылыми мектебі» сабақтастығы сақталып келеді», - деді ректор.

  Шара соңында үлгерімі үздік және қоғамдық белсенділігімен ерекшеленген Қазақ ұлттық қыздар педагогикалық университетінің төрт студентіне Күләш Құнантаева атындағы 3 миллион теңге көлеміндегі білім гранты салтанатты түрде табысталды. Әлеуметтік жауапкершілік аясында «Almaty Clinic» орталығы студенттерге QyzPU-дың 80 жылдық мерейтойына орай демеушілік көмек көрсетті.

Ақпарат көзі: Қазақстан Республикасы Ғылым және жоғары білім министрлігі