ҚР Президентінің кеңесшісі Мәлік Отарбаев алтыншы маусымда Қарағанды облысына екі күндік жұмыс сапарымен келді. Достық үйінде ол аймақтың жұртшылығымен және зиялы қауымымен кездесті. Жиналған қауыммен бірге "Адал адам – Адал еңбек – Адал табыс" ұлттық құрылтайының III отырысында қойылған міндеттердің іске асырылуын талқылады.

– Қазақстан Президенті Тәуелсіздік, Республика, Бірлік – біздің мемлекеттілігіміздің мызғымас тірегі екенін атап өтті. Біз осы тұжырымдамаларға ерекше назар аударуымыз керек. Бұл біздің әрбір азаматтың жүрегіне салатын басты құндылығымыз, – деді Мәлік Отарбаев.

Президенттің кеңесшісі су тасқынын жоюға көмектескені үшін қарағандылықтарға алғысын білдірді.

Кездесуге қатысушылар елімізде болып жатқан өзгерістерге оң баға беріп, Мемлекет басшысының бастамаларына қолдау білдірді. 

Қоғам қайраткерлері отбасылық құндылықтарға, сапалы білімге, еріктілер қозғалысын дамытуға қатысты әлеуметтік мәселелерді көтерді.

Мәлік Отарбаев облыс жастарымен де кездесті. Содан кейін Қарағанды қаласының отбасыларды қолдау орталығына барды. Кешке Қарағанды академиялық музыкалық комедия театрында Сыдық Мұхамеджановтың 100 жылдығына арналған "Айсұлу" операсының премьерасын тамашалады.

Бүгін Президент кеңесшісінің жұмыс сапары Осакаров ауданында жалғасты. Мәлік Отарбаев аудандық орталық аурухана мен Ә. Бөкейхан атындағы мектепке барады. Сондай-ақ, ауыл педагогтарымен және аудан жұртшылығымен кездесу өтіп, Мемлекет басшысының тапсырмаларын іске асыру бойынша маңызды мәселелер талқыланады.

Ақпарат көзі: ГУ «Аппарат акима Карагандинской области»