Биыл ҚР Президенті жанындағы Мемлекеттік басқару академиясында мемлекеттік қызметшілерді даярлауға магистратураға 120 және докторантураға 12 грант бөлінді. Оқу құжаттары 26 маусымға дейін қабылданады.

ҚР Президенті жанындағы Мемлекеттік басқару академиясына 2024–2025 оқу жылына қабылдау ережелері туралы Өңірлік коммуникациялар қызметі алаңында өткен брифингте оның Қарағанды облысындағы филиалының өкілі Серікжан Байбосынов айтып берді.

– Биыл Академияның мерейтойы. 30 жыл ішінде оқу орнын мыңдаған түлектер бітірді. Бүгінде олардың көпшілігі жоғары саяси, атқарушы және заң шығарушы органдарда қызмет етеді. Биыл құжаттарды қабылдау 26 маусымға дейін жалғасады. Келесі кезең 29 маусымда өтеді – онлайн режимінде аналитикалық эссе жазу керек болады. 1–20 шілде аралығында – Академия қабырғасында әңгімелесу өтеді. 22 шілдеде аралық қорытындылар шығарылады, ал 5 тамызда жалпы қорытынды шығарылады, – деді спикер.

Магистратураға түсетін үміткерлер үшін мемлекеттік қызметтегі ең төменгі еңбек өтілі кемінде 2 жыл, докторантураға кемінде 5 жыл болуы тиіс.

Қабылдау комиссиясына келесі құжаттарды тапсыру қажет:

- басшысы қол қойған мемлекеттік органның жолдамасы;

- жеке басын куәландыратын құжаттың сканерленген нұсқасы;

- қосымшасы бар жоғары білім туралы құжаттың сканерленген нұсқасы (магистратураға түсу үшін) немесе қосымшасы бар жоғары оқу орнынан кейінгі білім туралы құжаттың көшірмесі (докторантураға түсу үшін);

- В1 деңгейінен төмен емес мемлекеттік тілді меңгеру деңгейін растайтын Qazaq Resmi Test сертификаты (qrt.kz) немесе "Қазтест" (kazakhtest.kz);

- "Мемлекеттік басқару" және "Халықаралық қатынастар" магистрлік бағдарламаларына, "Экономика", "Халықаралық қатынастар" және "Мемлекеттік басқару" докторлық бағдарламаларына ағылшын тілін білетіндігін растайтын сертификат қажет (IELTS, TOEFL, Duolingo English Test). Егер бұрын мемлекеттік қызметші шетелде ағылшын тілінде оқыған болса, сертификат тапсырудың қажеті жоқ;

- мемлекеттік қызметшілер үшін – жұмыс орны бойынша кадр қызметімен расталған қызметтік тізім. Өзге үміткерлер үшін – еңбек қызметін растайтын құжат;

- докторантура үшін – Research proposal (зерттеу жұмысы жоспарының жобасы);

- ЭЦҚ қойылған өтініш.

Құжаттар admission.apa.kz академия сайтында онлайн-форматта қабылданады.

Биылғы жылдың жаңалықтары:

- "Мемлекеттік басқару" бағдарламасына құқық қорғау және арнайы мемлекеттік органдардан үміткерлер қабылданады;

- магистратура бағдарламалары үшін сұхбат үшін бағалаудың үлес салмағы 70%-ға дейін және докторантура үшін 50%-ға дейін көтерілді.

Серікжан Байбосынов сайланбалы ауыл әкімдері грантқа үміткер бола алмайтынын ескертті.

Академияда кәсіпкерлер мен квазимемлекеттік секторда жұмыс істейтіндер үшін арнайы модульдік бағдарлама әзірленді.

Ақпарат көзі: ГУ «Аппарат акима поселка Актас»