Дүниежүзілік қоршаған ортаны қорғау күні қарсаңында Теміртауда SAF AUA экологиялық бастамаларының II өңіраралық форумы өтті. 

Қоршаған ортаны бақылаудың автоматтандырылған жүйесі, қалдықтарды қайта өңдеу, өнеркәсіптің энергетикалық трансформациясы, экономикаға жасыл технологияларды енгізу, экологиялық қысымды төмендете отырып, өндіріс көлемін қалай сақтау және ұлғайту туралы айтылды.

Президенттің кеңесшісі, ҚР Президентінің халықаралық экологиялық ынтымақтастық жөніндегі арнайы өкілі Зульфия Сүлейменова жасыл таксономия, климаттық қаржыландыру, Қазақстанның жаһандық бағдарламаларға қатысуы, сондай-ақ жасыл экономикаға көшу мәселелерін көтерді.

– Климаттық қаржыландыру жаңғыртуға бағытталған. Мысалы электр қуаты желілері жақсы жұмыс істеуі үшін ЖЭК (жаңартылатын энергия көздері) интеграциясы бөлігін жаңғыртуға. Бұл жылумен жабдықтау жүйесін жақсарту, энергия тиімділігін арттыру, өндірісті көгалдандыру, "жасыл" болат өндірісі. Яғни, оның бәсекеге қабілеттілігін арттыру үшін өндірілген өнімнің тоннасына парниктиік газдар және т.б. шығарындыларының көлемін қалай азайтуға болатынын көрсетеді. Қазақстанда пайдаланылуы тиіс өте маңызды жаһандық құралдар бар, – деп атап өтті ол.

Өнеркәсіптік өңірлердің экологиялық проблемаларына назар аудару және оларды шешу жолдарын ұсыну үшін форумға ҚР Экология және табиғи ресурстар министрлігінің, халықаралық ұйымдардың, ғылыми қоғамдастық пен бизнестің өкілдері, Парламент депутаттары, сондай-ақ эко және қоғам белсенділері жиналды.

Бүгін Қарағанды облысының даму бағдарламасына экологиялық қауіпсіздікке қол жеткізуге бағытталған жобалар енгізілді. Атап айтқанда, бұл баламалы энергия көздерін салу, қоқысты бөлек жинауға арналған контейнерлерді орнату, жасыл аймақтарды құру, өнеркәсіптік кәсіпорындарды газдандыру.

– Біздің облыстағы экология – аса маңызды мәселелердің бірі, өйткені біз өнеркәсіптік өңірміз, – деп атап өтті Қарағанды облысының әкімі Ермағанбет Бөлекпаев. – Бұл Қарағанды, Балқаш және Теміртауға қатысты. Бес жылдық бағдарлама бар және біз оны орындаймыз. Біздің бюджетке түсетін экологиялық төлемдер тек эко бағдарламаларға кетеді. Қазірдің өзінде біраз нәрсе жасай бастадық – бұл көгалдандыру, абаттандыру, қоқыс жинау, тазарту қондырғыларының құрылысы. Qarmet басшылығымен тығыз жұмыс жасаймыз. Кездесулер кезінде біз өндіріс мәселелерін ғана емес, сонымен бірге экологияға қатысты барлық мәселелерді талқылаймыз.

Qarmet компаниясының өкілі қоршаған ортаға теріс әсерді азайтуды ескере отырып, алдағы жылдарға арналған даму стратегиясын таныстырды. Комбинатта қайталама ресурстарды қайта өңдеу бойынша жеке бөлімше құрылды. 2025 жылы өндірісті газдандыру басталады. 2030 жылға қарай шығарындыларды 30–35%-ға азайту жоспарлануда.

Форум қорытындысы бойынша мемлекеттік органдардың, бизнес-құрылымдардың және халықаралық ұйымдардың атына жіберілетін нақты ұсыныстары мен ұсынымдары бар қарар дайындалады.

Экология және табиғи ресурстар вице-министрі Жомарт Әлиев кездесуде өңір экологтарына ведомстволық наградалар табыс етті. 

Сондай-ақ, балалар сурет байқауының жеңімпаздары м

ен Қарағанды индустриалды университетінің пікірталас қатысушылары марапатталды.

Форумға қатысушылар Теміртау мәдениет сарайының жанына ағаш екті.

Ақпарат көзі: ГУ «Аппарат акима Карагандинской области»