Ақмола облысында көлік инфрақұрылымын дамыту қарқынды жүріп жатыр. Биыл өңірде жаңа республикалық автожолдың құрылысы басталады. Ол Астананы Арқалық, Торғай және Ырғыз қалаларымен байланыстырып, Транскаспий халықаралық бағытына шығуға мүмкіндік береді.

Жаңа жолдың Ақмола облысы аумағындағы ұзындығы 300 шақырымнан асады. Ол Целиноград, Қорғалжын, Егіндікөл, Атбасар және Жарқайың аудандары арқылы өтеді. Бұл елорда мен батыс өңірлер арасындағы көлік қатынасын айтарлықтай жақсартады.

«Жол-көлік инфрақұрылымын дамыту – біздің басым міндеттеріміздің бірі. Өткен жылы өңірде жол құрылысы мен жөндеу жұмыстарына 106 миллиард теңге бөлініп, 800 шақырымнан астам жол жаңартылды. 2025 жылы тағы 450 шақырым жол жөнделеді. Бұл мақсатқа 62,3 миллиард теңге қарастырылған. Жөндеу жұмыстары республикалық маңызы бар тасжолдармен қатар, елді мекендердегі көшелер мен жолдарды да қамтиды», – деп атап өтті Ақмола облысының әкімі Марат Ахметжанов.

Өңірде жолаушылар тасымалын жаңғырту жұмыстары да жалғасуда. 2024 жылы 24 қалалық және 2 қалааралық автобус сатып алынды. Сондай-ақ, субсидиялау бағдарламасы аясында әлеуметтік маңызы бар бағыттарда 130 автобус ауыстырылды. Бұл – өңірдегі автобус паркінің 64%-ын құрайды.

Теміржол қатынасына да ерекше назар аударылуда. Сәуір айында 11 теміржол вокзалы мен 5 станцияны қайта жөндеу жұмыстары басталады. Бұл жолаушыларға қызмет көрсету сапасын айтарлықтай арттыруға мүмкіндік береді.

Әуе тасымалы да назардан тыс қалған жоқ. Көкшетау халықаралық әуежайы Алматы, Ақтау және Шымкент қалаларына тұрақты рейстер орындайды. 2025 жылы жаңа Қызылорда – Көкшетау – Қызылорда бағыты ашылып, қолданыстағы рейстердің жиілігі артпақ.

Ақпарат көзі: ГУ «Аппарат акима Акмолинской области»