ҚР Премьер-Министрінің тапсырмасы бойынша ауыл шаруашылығы министрі Айдарбек Сапаров Жетісу облысына барып, қант қызылшасының жаңа дақылын қабылдау үшін екі қант зауытының дайындығын тексерді.

«Көксу қант зауытының» қуаттылығы тәулігіне 2500 тонна қант қызылшасы мен 300 тонна қамыс шикізатын құрайды. 2023 жылы зауытта 53 мың тонна қант, 2024 жылдың 7 айында 23 мың тонна қант өндірілді.

Министр зауытты аралап көріп, содан кейін қызылша қабылдау пунктінің аумағында қызылша егетін фермерлермен кездесіп, олардың саланы дамыту жөніндегі ұсыныстарын тыңдады.

«Шаруалар мемлекет тарапынан қолдау алуда: арзандатылған ЖЖМ бөлінді, тыңайтқыштарға, тұқымдарға, гербицидтерге субсидиялар төленеді. Егіс жұмыстары үшін жеңілдетілген несиелеу қарастырылған. Барлық айтылған мәселелерді біртіндеп шешетін боламыз», - деді Айдарбек Сапаров кездесуде.

Ақсу ауданында министр «Ақсу Кант» ЖШС жаңа маусымына дайындық жұмыстарының барысымен танысты. Кәсіпорынның қуаттылығы тәулігіне 3500 тонна қант қызылшасын құрайды. Өткен жылы зауыт қуаттылығы тәулігіне 400 тонна қамыс шикізатын қайта өңдеу желісін орнатты. Өткен жылы зауыт қазан айында іске қосылды, жыл соңына дейін 10 мың тонна қант өндірілді.

Ескелді ауданында министр «Дүйсембинов» ШҚ қызылша алқабында болды.Жұмыс сапарының қорытындысы бойынша облыс әкімдігіне егін жинау барысын бақылауға алу, қант қызылшасын жинау бойынша егін жинау науқанын ұйымдастыруға жәрдемдесу тапсырылды.

Естеріңізге сала кетейік, биыл Қазақстанда рекордтық 1,1 млн тонна қант қызылшасын жинау жоспарлануда. Осыған байланысты Жамбыл облысы мен Жетісу облысының шаруалары үшін шикізатты өткізу және қайта өңдеу мәселесі өзекті болып отыр.

Бұған дейін Айдарбек Сапаров Жамбыл облысының кәсіпорындарында болып, фермерлермен кездесті. Сапар қорытындысы бойынша қант қызылшасын жөнелтуге, өңдеуге қатысты мәселелер жедел шешілді.

Ақпарат көзі: Министерство сельского хозяйства Республики Казахстан