«Спасск» оқу-жаттығу орталығында Қарағанды мектептерінің алғашқы әскери дайындық пәнінің 40-тан астам оқытушысымен алғаш рет оқу-әдістемелік жиын өтті. 

Іс-шара «Астана» өңірлік қолбасшылығы әскерлерінің қолбасшысы генерал-майор Ержан Ыбыраевтың басшылығымен ұйымдастырылды.

Әскери қызметшілер мектеп мұғалімдерімен әскери қызметтегі құқықтық негіздер, тіршілік қауіпсіздігі және ақпараттық технологиялар, сондай-ақ саптық, тактикалық және атыс дайындықтары бойынша сабақтар өткізді. Оқушылармен сабақ өткізу әдістемесін оқытуға жіті назар аударылды. 

«Спасск» оқу-жаттығу орталығының аумағында 30 жылдан астам әскери қызмет өткерген Қарағанды қаласының № 1 гимназиясының алғашқы әскери дайындық пәнінің мұғалімі запастағы майор Назип Латыпов әскери бөлім туралы жылы естеліктерімен бөлісті.  

– Соңғы жылдары армияда көп нәрсе жақсарды, жаңа заңдар, нормативтік-құқықтық актілер шықты. Мұндай жиындар бізге қажет. Өйткені, бүгін көкейдегі көптеген сұрақтарға жауап алдық, біраз жаңа және пайдалы нәрселерді білдік. Енді жаңа оқу жылын жаңартылған біліммен бастаймыз, – деп атап өтті запастағы майор Назип Латыпов.

Одан өзге, сабақтарда білім беру ұйымдары мен әскери бөлімдер арасындағы өзара іс-әрекетті нығайту мәселелері, сондай-ақ әскерге шақырылғанға дейінгі жастармен әскери-патриоттық жұмыстың түрлі аспектілері де қаралды.

Ақпарат көзі: Министерство обороны Республики Казахстан