Алматыдағы Бауыржан Момышұлы атындағы республикалық «Жас ұлан» мектебін 38-ші түлектер бітірді.

Іс-шараға әскери жоғары оқу орындарының бастықтары, «Қарулы Күштердің ардагерлері» РҚБ Алматы қ. филиалының төрағасы отставкадағы полковник Төлеген Мұстафин, оқытушылар, оқу орнының әр жылдардағы түлектері және ата-аналар қатысты. 

 «Жас ұлан» республикалық мектебінің бастығы полковник Нұрлыхан Ерекешов түлектерді атаулы оқиғамен құттықтады. 

– Біз әрқашан сендермен мақтанамыз. Оқу барысында алған білімдерің мен дағдыларың одан әрі кәсіби өсулеріңе негіз болсын. Сендер біздің үмітімізді ақтап, аты аңызға айналған қолбасшының есімімен аталатын мектеп түлегі деген атақты абыроймен алып жүретіндеріңе сенімдімін, – деді ол.

Биыл мектепті 197 жас ұлан аяқтап отыр. Марғұлан Медетақын мен Әлихан Жұматай үздік аттестат иегерлері атанды. Түлектер қатарында «Дарын» республикалық ғылыми жобасының жүлдегерлері Тахауи Ниетбек, Әділет Мақанов және Ерболат Мәмек бар. Одан өзге 24 тәрбиеленуші «Дарын» және «Абай» пәндік олимпиадаларының жүлдегерлері.

– Біз жауынгерлік дәстүрді құрметтеуге, ақиқатты, адалдықты және әділдікті қорғауға, Отанның нағыз патриоты болуға уәде береміз, – деді түлек Рамазан Жолдан.

Жастардың көпшілігі болашағын ҚР Қарулы күштері қатарындағы қызметпен байланыстыруды жоспарлап отырғанын айта кетелік. Қазірдің өзінде балалар әскери жоғары оқу орындарына түсу үшін алғашқы сынақтардан өтті.

Ақпарат көзі: Министерство обороны Республики Казахстан