Қазақстан Республикасы Қаржы нарығын реттеу және дамыту агенттігінің (бұдан әрі – Агенттік) Талдықорған қаласындағы өңірлік өкілдер басқармасы бастығының 2024 жылғы 19 қыркүйек №3 бұйрығына сәйкес «Кредиттік серіктестік «Алтын дала» жауапкершілігі шектеулі серіктестігі (бұдан әрі – КС) микроқаржылық қызметті жүзеге асыруға берілген лицензиясынан айырылды.

«Микроқаржылық қызмет туралы» Қазақстан Республикасы Заңының 16 бабы 2 тармағының 3) тармақшасына сәйкес уәкілетті органның жазбаша нұсқамаларын жүйелі түрде (қатарынан күнтізбелік он екі ай ішінде үш және одан көп рет) орындамауы лицензиядан айыру үшін негіздеме болды.

 «Микроқаржылық қызмет туралы» Қазақстан Республикасы Заңының 16-бабы 9-тармағының талаптарына сәйкес КС Агенттік микроқаржылық қызметті жүзеге асыруға лицензиядан айыру туралы шешім қабылдаған күннен бастап күнтізбелік отыз күн ішінде өзінің атауынан «кредиттік серіктестік» деген сөздерді, олардан туындайтын, көрсетілген заңды тұлғаның микрокредиттер беру жөніндегі қызметті жүзеге асыратынын болжайтын сөздерді немесе аббревиатураларды алып тастау арқылы қайта тіркеу рәсімін жүргізуге не қайта ұйымдастыру немесе тарату туралы шешім қабылдауға міндетті.

         Микрокредит беру туралы шарттар бойынша орындалмаған міндеттемелері бар КС клиенттері, КС алдындағы міндеттемелердің орындалуын бұзғаны үшін, микрокредит беру туралы жасалған шарттардың талаптарына сәйкес жауапты болады.

Ақпарат көзі: Қазақстан Республикасының Қаржы нарығын реттеу және дамыту агенттігі