AMANZHOLOV UNIVERSITY БАЗАСЫНДА ИНКЛЮЗИВТІ БАСТАУЫШ МЕКТЕП АШЫЛДЫ

  С.Аманжолов атындағы Шығыс Қазақстан университетінде инклюзивті бастауыш мектеп ашылды. Осы оқу жылынан бастап 5-6 жастағы сөйлеу дамуы тежелген балаларға университет мамандары дәрігерлік ұсыныстар мен жеке ерекшеліктерді ескере отырып, сапалы білім беру процесін бастайды.

  Бұл инновациялық жоба ҚР Ғылым және жоғары білім министрі Саясат Нұрбектің университетке сапары барысында таныстырылды. Министр инклюзивті білім беру ведомствоның стратегиялық басым бағыттарының бірі екеніне тоқталып, оқу орынның бұл бастамасын жоғары бағалап өтті.

  -Министрліктің стратегиясында инклюзивті білім беру ең басым бағытқа ие. Инклюзивті білім беретін педагогтерді дайындауда іріктелген үздік жоғары оқу орындарының ішінде осы С.Аманжолов атындағы ШҚУ бар. Университет инклюзивті білім беруге арналған арнайы кабинеттер мен әдістемелік материалдармен толық қамтамасыз етілген. Заманауи талаптарға сәйкес сапалы білім беру ШҚУ-ды ел көлемінде көшбасшы етеді, - деді Саясат Нұрбек.

  Алғашқы сабақтар қазақ және орыс тілдерінде 15 қазанға жоспарланған. Оқу жылы бойы педагогтер мен ассистенттер негізгі және қосымша сабақтарды аптасына бес күн өткізіп, ата-аналардың таңдауына әртүрлі пәндер ұсынады. Олардың қатарында логика, логопедия, сенсорлық-спорттық секциялар, робототехника, тілдерді үйрену және тағы басқалар бар.

  С.Аманжолов атындағы ШҚУ ректоры Мұхтар Төлеген мамандардың бірнеше жыл бойы дайындық жүргізгенін және қазіргі уақытта университет бастауыш білім беру саласында заңды қызметке лицензия алғанын атап өтті.

  Мектеп арнайы жиһазбен жабдықталған, оны университеттің «Shygys Bastau» өндірістік цехы дайындады. Сонымен қатар мектепте кедергісіз орта жасалып, әдістемелік сүйемелдеу қамтамасыз етілген.

  Психология және түзету педагогикасы кафедрасының қауымдастырылған профессоры Светлана Стельмахтың айтуынша, инклюзивті бастауыш мектеп баланың интеллектуалды, әлеуметтік және эмоционалды дамуына ықпал етеді, бұл оның әрі қарайғы дамуы мен сапалы өмір сүруінің негізін қалайды. Оқу процесінде балалардың ақыл-ой белсенділігіне көңіл бөлініп, тұрақты психологиялық тексерулер жүргізіледі.

  Бұл жоба – С.Аманжолов атындағы ШҚУ-дың инклюзия саласындағы екінші ірі жобасы. 2022 жылдан бері университетте «Дана бала» үздіксіз және инклюзивті білім беру орталығы жұмыс істеп келеді.

Ақпарат көзі: Қазақстан Республикасы Ғылым және жоғары білім министрлігі