Қамысты ауданының тұрғындары Қазақстан Президентінің 2024 жылдың сәуір айында басталған «Таза Қазақстан» ауқымды экологиялық акциясын белсенді түрде қолдады. Әр сейсенбі, сәрсенбі және бейсенбі күндер «Тазалық күндері» деп жарияланды.

Акция барысында 21 551 тонна қоқыс шығарылып, 3 850 көшет отырғызылды, 4 670 адам сенбілікке қатысты. Барлығы 150-ден астам сенбілік өткізіліп, оған ауданның барлық тұрғындары, соның ішінде мемлекеттік қызметшілер, бюджеттік сала қызметкерлері, шағын және орта бизнес өкілдері мен аудан жастары белсене ат салысты. 

Бүгін, сейсенбі күні Қамысты елді мекенінде өткен экоакцияға қатысушылар ойын алаңдары аумағын қоқыстан тазарту, кесілген бұтақтарды жинау және қоршаған ортаны абаттандыру бойынша кешенді жұмыстар жүргізді. Іс-шара   барысында ауданның шығармашылық ұжымдарының қатысуымен концерт ұйымдастырылып, жергілікті өндірушілердің экоөнімдер жәрмеңкесі өтті, сондай-ақ қонақтарға тәттілер таратылды.

 «Таза күндерді» ұйымдастырушылар аумақты тазарту мен көріктендірумен қатар, ауқымды іс-шаралар бағдарламасын жасап, оны белсенді түрде жүзеге асыруда.

Оның ішінде тозығы жеткен тұрғын үйлерді бұзу, 10 шақырымдық қоршауды ауыстыру, 2,9 шақырымға жаяу жүргіншілер жолын жасау, 23 көшені жарықтандыру, бірнеше елді мекеннің жолын жөндеу, Арқа ауылындағы стадионды қайта жөндеу, балалар және спорт алаңдарын орнату, ағаш отырғызу сынды бастамалар бар.

Сондай-ақ, жазғы екі ай бойы ауданда 63 жауынгерден тұратын «Жасыл ел» жастар жасағы жұмыс істеді.

Ақпарат көзі: ГУ «Аппарат акима Костанайской области»