Уфа қаласында "Туганлык" ұлттық театрларының VIII халықаралық фестивалі тәмамдалды. С. Сейфуллин атындағы Қарағанды облыстық қаздрамтеатры дарынды қазақстандық режиссер Гүлназ Балпейісованың қойылымында Мұхтар Әуезовтің "Қарагөз" трагедиясын ұсынды.

Бүгінгі күнмен үндестірілген отандық классика інжу-маржанының жаңа нұсқасы танымал театр және өнертанушылар тарапынан жоғары бағаланды. Сыншыларды Қарағанды театры актерлерінің ойын мәнері ерекше таң қалдырды.

Нәтижесінде "Үздік ер адам рөлі" номинациясында "Қарагөз" спектаклінде Нарша рөлін сомдаған С. Сейфуллин театрының актері Бауыржан Нұрмағамбетов марапатталды.

Негізгі номинациялар үшін марапаттардан басқа, фестиваль қатысушыларына жақсы ойын үшін арнайы сыйлықтар берілді. Қаздрамтеатрымыздың актрисасы Әнелі Сағындықова Қарагөзді сомдағаны үшін арнайы марапатқа ие болды.

Халықаралық фестивальге Ресейдің әртүрлі аймақтарынан 15 театр, сондай-ақ Қазақстан мен Қырғызстан театрлары қатысты. Бір апта бойы қазылар алқасы мен сарапшылар әр түрлі жанрдағы 16 спектакльді көріп, талқылады. Уфа театр сахналарында күн сайын үш қойылым көрсетілді.

– "Туганлык" фестивалінің бағдарламасы белгілі әртістерден тәжірибе алмасу, шеберлік сабақтары сияқты білім беру іс-шараларына толы болды, – деді С. Сейфуллин атындағы Қарағанды облыстық академиялық қазақ драма театрының жетекшісі Құрман Қалымов.

Биылғы фестиваль Уфа қаласының 450 жылдығына арналды.

"Туганлык" фестивалінің тарихы 1991 жылдан бастау алады. Ол алдымен түркітілдес халық театрларының фестивалі деп аталды, ал бүгін халықаралық ұлттық театрлар фестивалінің деңгейіне көтерілді.

Ақпарат көзі: ГУ «Аппарат акима Карагандинской области»