Қарағанды облысында биыл WorldSkills өңірлік чемпионатына 300-ден астам колледж студенттері қатысып жатыр. Жарыс 45 мамандық бойынша 17 алаңда өтуде. Нәтижесінде WorldSkills Kazakhstan – 2024 республикалық чемпионатына жолдама алатын өз ісінің үздік білгірлері анықталады.

WorldSkills чемпионаттары жастарды экономиканың өндірістік секторына тартуға, индустриялық және сервистік кәсіптерді дамытуға ықпал етеді, деп атап өтті ұйымдастырушылар.

Конкурстар кірпіш қалау, құрғақ құрылыс және сылақ жұмыстары, дәнекерлеу технологиялары, өнеркәсіптік дизайн, бизнеске арналған IT-шешімдер, СББ станоктарында токарлық жұмыстар, мобильді робототехника, флористика және т. б. сияқты мамандықтар бойынша ұйымдастырылған.

Мысалы, Шахтинск технологиялық колледжінің базасында "Электроника" және "Компьютерлік ойындарға арналған 3D-модельдеу" құзыреттіліктері бойынша жарыстар өтті. Өңірдегі 11 колледжден 13 студент өз шеберліктерін көрсетті. Байқауға қатысушылар бағдарламаға сәйкес модульдер бойынша тапсырмаларды орындады.

"СББ станоктарындағы токарлық жұмыстар" құзыреттілігі бойынша кәсіби шеберліктің республикалық чемпионатына жолдама алу үшін төрт қатысушы бақ сынасты. Жарыс Қарағанды машина жасау колледжінің алаңында ұйымдастырылды.

WorldSkills өңірлік кезеңінің қорытындысы 24 мамырда жарияланады. Жеңімпаздар қараша айында өтетін ұлттық чемпионатта біздің облыстың намысын қорғайды.

Қазақстан 2014 жылы WorldSkills халықаралық қозғалысына қосылды.

Фото umckrg.gov.kz

Ақпарат көзі: ГУ «Аппарат акима Карагандинской области»