Қазақстанның шахтерлар астанасында екі мәрте Кеңес Одағының Батыры Талғат Бигелдинов атындағы «Жас ұлан» мектебінің 179 тәрбиеленушісіне аттестаттар табыс етілді.

Салтанатты шараға «Астана» өңірлік қолбасшылығы әскерлері қолбасшысының орынбасары полковник Шәкен Жарылқасынов, Қарулы күштердің ардагерлері, ауған жауынгерлері мен ата-аналар қатысты. 

Мектептің көптеген тәрбиеленушілері – әскери әулеттердің жалғасы. Сондықтан дәстүр бойынша олар болашағын армиямен байланыстырамыз деп шешім қабылдаған. 

– Екі жылғы оқудың нәтижесінде көп нәрсе үйрендім, лайықты білім алдым, темірдей тәртіпке бағынып, шымыр болдым. Мұның бәрі маған Құрлық әскерлерінің әскери институтына түсуге көмектеседі. Болашақта атам сияқты офицер болғым келеді, – деп түлек Дәулен Бекежан өз жоспарларымен бөлісті.

Тәттімбет атындағы Қарағанды өнер колледжінің студенттері мен ұландар билеген вальс іс-шараға ерекше көрік берді. Ал қоян-қолтық ұрыстың элементтерін көрсеткен соң мектеп оқушылары алаңда салтанатты маршпен жүріп өтті. 

Айта кету керек, 40 жыл ішінде мектеп қабырғасынан бес мыңнан астам түлек білім алып шықты. Олардың ішінде ҚР Қарулы күштері Бас штабы бастығының орынбасары генерал-майор Сәкен Жүсіпов және Құрлық әскерлерінің бас қолбасшысы генерал-майор Асан Жүсіпов, оған қоса Таулы Қарабақтағы жанжалды реттеуге және Чернобыль АЭС-на техногендік апат салдарын жоюға қатысқандар да бар.

Ақпарат көзі: Министерство обороны Республики Казахстан