Қарағанды облысында бірнеше заманауи цифрлық жобалар іске асырылу үстінде. Олардың барлығы мемлекеттік және жеке ұйымдардың жұмысын ашық көрсетуге арналған. Ал тұрғындарға қажетті қызметтерге жеңіл қол жеткізуге мүмкіндік береді.

Өңірлік коммуникациялар қызметінің платформасында өткен брифингте  Қарағанды облысының ақпараттандыру, мемлекеттік қызметтер көрсету және архивтер басқармасының басшысы Константин Ильницкий өңірді одан әрі цифрландыру бағытындағы атқарылған жұмыстар мен жоспарлар туралы айтты.

"Senim109" ЕКО

Облыста 2019 жылдан бастап "Senim109" бірыңғай үйлестіру орталығы жұмыс істейді. 2023 жылы мұнда 138 мыңнан астам, биыл 50 мыңнан астам өтініш келіп түскен. Өткен жылдың мамыр айынан бастап азаматтардың өтініштеріне жедел ден қоятын мониторингтік топ жұмыс істейді. 2024 жылы денсаулық сақтау басқармасының Call-орталығымен 109 call-орталығын "Senim109" қызметінің бірыңғай байланыс орталығына біріктіру жоспарлануда. Сондай-ақ, БҮО базасында Қарағанды облысының тұрғын үй қорын, атап айтқанда лифт шаруашылығын жаңғырту мәселелері бойынша қоңырауларды қабылдау алаңы құрылатын болады.

"Қауіпсіз қала"жобасы

"Қауіпсіз қала" жобасы аясында Қарағанды, Теміртау, Саран қалаларында және Абай ауданының Дубовка кентінде 3374 бейнебақылау камерасы және 148 ЖЖЕ бұзушыларды тіркеу кешені жұмыс істейді.

– Биыл Теміртаудан Ақмола облысының шекарасына дейінгі Республикалық маңызы бар трассаларда жылдамдық өлшегіштер орнатылды. Сондай-ақ, Балқаш, Абай және Бұқар Жырау ауданындағы Ботақара кентінде жол ережесін бұзушыларды тіркеу кешендері пайда болды. Жыл басынан бері облыста аппараттық-бағдарламалық кешендер арқылы 37 мыңнан астам құқық бұзушылық анықталды. Бұл өткен жылмен салыстырғанда ереже бұзушылар санын 7,5% -ға дейін азайтуға мүмкіндік берді, – деді Константин Ильницкий.

Геоақпараттық портал

2023 жылы аймақтық геоақпараттық портал іске қосылды. Осы жобаның арқасында облыстың сегіз қаласында жер учаскелерін берудің барлық процесі – таңдаудан бастап өтініш пен тіркеуге дейін-электрондық форматқа ауыстырылды. Сонымен қатар, атқарылатын жұмыстар саны бірнеше есеге, ал мемлекеттік қызмет көрсету мерзімі бір жылдан 30 күнге дейін қысқарды. Қызметті облыстың 4,5 мыңнан астам тұрғыны пайдаланды.

IQala коммуналдық қызметтер сайты

Сондай-ақ, өткен жылдың қаңтарында IQala Қалалық қызметтер порталы іске қосылды. Сайт тұрғындарға қашықтан 5 мыңнан астам монополистер мен коммуналдық қызметтерді алуға мүмкіндік береді. Қазір мұнда жеті ірі монополистің 59 қалалық қызметі цифрландырылған. Жыл соңына дейін Теміртау мен Балқаштағы монополистердің қызметтерін цифрландыру жоспарлануда.

 IT-хаб «Террикон алқабы» мен Terricon school

IT және Digital салаларын дамытатын дарынды Қарағанды жастары үшін өңірлік IT-хаб "Террикон алқабы" өте маңызды.

– Өткен жылы стартаптарды акселерациялау және инкубациялау бойынша жеті бизнес-бағдарлама, 350-ден астам іс-шара өткізілді, соның арқасында жобалар 450 млн теңгеден астам табыс тапты. 2024-2026 жылдары Қазақстанның бизнес- инвесторлары мен венчурлік қорларын тарта отырып, 5 млн долларды құрайтын венчурлік қор ашу жоспарлануда. Қордың мақсаты-ерте кезеңдегі жобаларға инвестиция салу және бірлесіп инвестициялау үшін салалық серіктестерді тарту, – деді спикер.

Terricon school-да сұранысқа ие және перспективті бағдарламалау тілдерін оқуға болады. Қазір мұнда 90-ға жуық адам оқиды, олардың 58-і TechOrda бағдарламалау мектептерін қаржылық қолдау бағдарламасы бойынша келген.

Интернет және байланыс

Халыққа ұялы байланыс пен интернетті қолжетімді ету жұмыстары жалғасуда. Абай ауданының Қоянды және Қойбас, Ақтоғай ауданының Қарасу, Қаракөл және Қарқаралы ауданының Аппаз ауылдарында байланыс желілері жаңғыртылды. Бұқар Жырау ауданының Төрткөл ауылы байланыспен қамтамасыз етілген. Нәтижесінде алты елді мекен 4G интернетіне қол жеткізді.

Жергілікті бюджет есебінен үй интернетіне Нұра ауданының Тікенекті, Баршын, Талдысай, Жанбөбек және Құланөтпес ауылдары қосылды. Жыл соңына дейін Ақтоғай ауданының Ақши ауылы және Қарқаралы ауданының жеті ауылы – Ақжол, Талдықорған, Қоянды, Абыз, Ақбай-Қызылбай, Айрық және Сарыобалы мобильді интернетпен қамтамасыз етіледі.

– Жыл соңына дейін облыстың 42 ауылдық елді мекенінде талшықты-оптикалық байланыс желілері салынатын болады. 2027 жылға дейін облыстың 164 ауылдық елді мекені интернет желісімен қамтамасыз етілуі тиіс. Республикалық және негізгі облыстық автожолдарды мобильді интернетпен қамтамасыз ету үшін цифрлық инфрақұрылым салу жоспарланған. Алдағы екі жылда 14 антенна-діңгек орнату жоспарлануда, – деді Константин Ильницкий. – Баянауыл, Балқаш және Қарқаралы бағытында байланыс орнатылады.

Қазір Қарағандыда 5G желісінің 13 базалық станциясы орнатылған. 2025 жылдың соңына дейін 5G желісін облыс орталығының барлық аумағына тарату жоспарлануда. 

1 қыркүйекке дейін 106 шалғайдағы ауылдық мектеп SpaceX компаниясының Starlink технологиясы бойынша кең жолақты интернетке қосылады.

Ақпарат көзі: ГУ «Аппарат акима поселка Актас»