Осы жылдың 5 айында Қарағанды облысында ет және сүт өндіру көлемі ұлғайды. Ауыл шаруашылығының жалпы өнімі 89,9 млрд теңгеге жетті. Халықты сапалы және қолжетімді ауыл шаруашылығы өнімдерімен қамтамасыз ету - басты міндеттердің бірі.

Облыс әкімдігіндегі аппараттық кеңесте ауыл шаруашылығы басқармасының басшысы Саят Мусин азық-түлік қауіпсіздігін арттыру үшін қабылданып жатқан шаралар туралы хабардар етті.

— Ет және сүт өндіру көлемі 2,8 және 0,8 пайызға өсті. ІҚМ саны 1,2 пайызға өсті. Биыл көктемгі егіс алқабы өткен жылдың деңгейімен салыстырғанда 15,2 мың гектарға ұлғайып, 1 млн 91 мың гектарды құрады, — дейді Саят Мусин. — Жемшөп дақылдарының егісі 143,4 мың гектарға дейін ұлғайтылды. Ауыл шаруашылығы құрылымдарындағы картоп 11 991 гектар алқапқа, көкөністер — 994 гектарға отырғызылды. Сұрыпты жаңарту үшін 102 шаруашылық 8 мың тоннадан астам жоғары өнімді дәнді тұқымдар сатып алды, оның ішінде 5,9 мың тонна элиталы тұқым. Барлығы 104,3 мың тонна дәнді дақылдар егілді.

Ауа-райының қолайлы жағдайында аймақ фермерлері өткен жылдарға қарағанда 10—16 пайызға көбірек картоп пен дәнді дақылдарды жинауды жоспарлап отыр. Биыл егін егу науқаны мен егін жинау үшін 399 қосымша ауылшаруашылық техникасы сатып алынды. 1 шілдедегі жағдай бойынша ауыл шаруашылығы тауарын өндірушілер 5,8 млрд теңгеге субсидия алды.

Облыс әкімі Ермағанбет Бөлекпаев халықты қолжетімді өнімдермен қамтамасыз етудің маңыздылығын, сондай-ақ бағаны бақылау қажеттігін атап өтті.

— Өндірушілердің белгілі бір шығындары бар екені түсінікті. Бұл электр энергиясының қымбаттауы, ЖЖМ және басқа шығындар. Дегенмен, біз халықты қол жетімді ауыл шаруашылығы өнімдерімен, нанмен қамтамасыз етуіміз керек. Бағаны ұстап тұру мәселесін пысықтауды тапсырамын. Тұтастай алғанда, азық-түлік қауіпсіздігі басым мәселелердің бірі болып қала береді және оны шешуге кешенді және жүйелі түрде қарау керек.

Өсімдік шаруашылығында, мал шаруашылығында және қайта өңдеу саласында жаңа инвестициялық жобаларды іске асырмай, өсудің белгіленген индикаторларына қол жеткізу мүмкін емес. Биыл өңірде 30 жобаны жүзеге асыру жоспарланған, бұл 185 жаңа жұмыс орнын ашады.

Ақпарат көзі: ГУ «Аппарат акима Карагандинской области»