Жаңа оқу жылында Қарағанды облысының колледждерінде бес жаңа мамандық бойынша ерекше қажеттілігі бар студенттер үшін сегіз топ ашу жоспарлануда: тамақтануды ұйымдастыру, тігін өндірісі және киім үлгілеу, аяқ киім ісі, ғимараттар мен құрылыстарды салу және пайдалану, сәндік-қолданбалы өнер және халық кәсіпшілігі (бейіні бойынша). Қарағанды техникалық-құрылыс колледжінің базасында мүмкіндігі шектеулі жандарды кәсіби даярлау үшін ресурстық орталық іске қосылды. Өңірде мүгедектігі бар жастарды жұмысқа орналастыруға көп көңіл бөлінеді.

Бұл туралы ерекше балалардың ата-аналарына Қарағанды облысының әкімі Ермағанбет Бөлекпаевпен тоқсан сайынғы кездесу барысында хабарланды. Дәстүрлі ашық диалогқа басқарма басшылары, қала және аудан басшылары қатысты.

Өзекті мәселелердің бірі – мүгедектігі бар жастарды жұмысқа орналастыру.

– 37 Қарағанды колледжінде инклюзивті білім беру үшін жағдай жасалған. Бүгінде мұнда 14 мамандық бойынша ерекше білім беру қажеттіліктері бар 359 студент оқиды. Бірақ ең бастысы – түлектерді жұмысқа орналастыру мәселесі. Биыл 162 студент оқуын аяқтайды. Алдын ала мәліметтер бойынша, әзірге 61 адам жұмыспен қамтылмаған, оның ішінде денсаулық жағдайы бойынша да, – деді Білім басқармасы басшысының орынбасары Азамат Бөлкенбаев.

Түлектер мансап орталықтарында жұмысқа орналасу мәселелері бойынша кеңес беруге дайын. Жұмыспен қамту және әлеуметтік бағдарламалар басқармасының басшысы Әсем Жүніспекованың айтуынша, оларға ерекше білім беру қажеттіліктері бар 270 жас жүгінді. Бұл ретте олардың 104-і жұмысқа орналастырылды. Олар әлеуметтік жұмыс орындарына жолдама алды, қоғамдық жұмыстармен айналысады және "Жастар тәжірибесі" бағдарламасына қатысады. Төрт адамға бизнес-идеяларды жүзеге асыру үшін гранттар берілді.

Өңір басшысы еңбек еткісі келетін және жұмыс істей алатын кез келген адамға жұмыс табуды тапсырды.

Ерекше балалардың ата-аналары білім, әлеуметтік көмек, спорт және медицинаға қатысты мәселелерді тағы көтерді. Арнайы сыныптардың, спорт секцияларының және мамандардың тапшыдығы, әсіресе аудандарда жоқтың қасы екенін айтып, шағымданды. Сонымен бірге олар кездесулердің арқасында көп нәрсе шешілгенін атап өтті.

– Менің ерекше балам қазір 21 жаста. Сондықтан мен жағдайдың жақсарып келе жатқанын көріп отырмын. Қазір мүлдем басқаша: біздің өтініштерімізге құлақ түреді, бізге көмектеседі. Мүгедек балалары бар қамқоршыларға тегін жол жүруді ұйымдастыруды сұрағанымыз есімде. Бұл мәселеміз назарға алынды. Ата-аналардың жұмысқа шығуы үшін 18+ балаларға арналған күндізгі топ құру мәселесі шешілуде. Биыл Даун синдромы бар 18 жастан асқан балалар инватаксиді қолдана алады, – дейді ата-аналардың бірі Жанар Нақбосынова.

Аймақ басшысы көп жұмыс жасалғанына келісті, бірақ алда әлі біраз жұмыс күтіп тұр.

– Кездесуді, мәселелерді талқылауды және оларды шешудің жолдарын табуды жалғастырамыз. Бүгінгі сұрақтарды құрылымдап, келесі жолы егжей-тегжейлі жауаптар беру керек. Әрине, кейбір мәселелер бюджет қаражатына байланысты. Бірақ тез шешуге болатын және шешілуі керек ұйымдастырушылық мәселелер бар. Ата-аналарға шыдамдылық пен сындарлы ұсыныстарымен бөліскені үшін алғыс айтамын. Біз ерекше балаларға барлық жағдай жасауымыз керек, – деп атап өтті Ермағанбет Бөлекпаев.

Ақпарат көзі: ГУ «Аппарат акима Карагандинской области»