Бұл ауыл екі жыл қатарынан көктемгі су тасқынынан зардап шекті.

2024-2025 жылғы көктемгі су тасқынына қарсы іс-шаралардың Жол картасын іске асыру аясында Ойыл ауданы Ш. Берсиев атындағы ауылдық округіне қарасты Қаратал ауылында өзен суының тасуынан қорғану үшін бөгет салынды.

Жобаның бас мердігері – «Ararat Group» ЖШС. Құны - 866 млн теңге.

«Қараталдағы былтырғы жылғы салынған бөгет құрылысы 2024 жылдың желтоқсан айында толық аяқталды. Ұзындығы 4 шақырымды құрайды. Енді су бұрынғыдай ауыл ішімен өтпей, арнайы салынған су бұру арналары арқылы айналып өтіп, өзен арналарына құйылуда. Бұл шешім ауыл тұрғындары үшін қауіпсіздікті арттырып, су тасқыны қаупін азайтты», - дейді ауыл әкімі Әділбек Избасов.Былтыр Ойыл ауданында тасқын судан 328 үй зардап шекті. 172 үй жаңадан салынып, 135 үй екінші нарықтан сатып алынды. 21 үйге қайта жөндеу үшін қаражат бөлінді. Қаратал ауылында 126 жаңа үй салынды.

Ақпарат көзі: ГУ «Акимат Актюбинской области»