Елорданың халықаралық әуежайында киокушинкай каратэден әлем чемпионатының күміс жүлдегері атанған астаналық Самихан Тыныбайды жанкүйер қауым күтіп алды. Салтанатты кездесуге дене шынықтыру және спорт басқармасының қызметкерлері, спортшының туыстары мен жақындары қатысты, деп хабарлайды қала әкімдігінің ресми сайты.

«Чемпионат жоғары деңгейде өтті. Біз өз спортшыларымыздың жеңісін мақтан тұтамыз. Ең алдымен, біз жастар мен болашақ кәсіби спортшылар үшін үлгі болуға тырысамыз», – дейді Qazaq National Alliance Kyokushin Ryu жаттықтырушысы, жетекшісі Дәурен Оқасов.

Самихан Тыныбайдың әкесі әлемдік біріншілікте қолдау көрсеткен қазақстандықтарға алғысын білдіріп, өз пікірімен бөлісті.

«Біз жаз бойы жаттығып, чемпионатқа дайындалдық. Қарсыластар Италиядан, Қытайдан, Ресейден және басқа да елдерден мықты болғанын атап өткім келеді. Әлем чемпионатына дейін біз өтпелі турнирге қатысып, нәтижесінде жартылай финалға шықтық. Жарыстың өзі екі кезеңде өтті, нәтижесінде біз 6-17 жас аралығындағы балалар арасында екінші орынға ие болдық», – деді Жан Тыныбаев.

Естеріңізге сала кетейік, 3-4 қазан аралығында Қытайдың Тяньцзинь қаласында балалар, жасөспірімдер және ардагерлер арасында киокушинкай каратэден әлем чемпионаты өтті. Оған әлемнің 35 елінен барлығы 500-ге жуық спортшы қатысты.

Ақпарат көзі: ГУ «Аппарат акима города Астана»