Астанада CONNECTED халықаралық конференциясының ашылуы өтті

  2024 жылғы 18-19 қазанда Қазақстанның Астана қаласында болашақ образын түсіну туралы CONNECTED-2024 халықаралық конференция өтіп жатыр.

  Конференцияға әлемнің 20-дан астам елінен 1500-ге жуық делегат қатысады. Олардың қатарында футурологтар, философтар, инновациялар мен технологиялар саласындағы көшбасшылар, қоғам және мемлекет қайраткерлері, әлемдегі жетекші EdTech-компаниялардың, халықаралық ұйымдардың, трансұлттық корпорациялардың және т.б. құрылтайшылары мен өкілдері бар.

  Іс-шараның салтанатты ашылуында ҚР Премьер-министрінің орынбасары Тамара Дүйсенова сөз сөйлеп, Президент Қасым-Жомарт Тоқаевтың құттықтау хатын жеткізді.

  Мемлекет басшысы «CONNECTED 2024» — бұл шығармашылық идеяларды талқылауға, болашақты болжауға, сондай-ақ озық білім мен тәжірибе алмасуға бағытталған бірегей жоба екенін атап өтті.

  «Қазақстан шетелдің беделді жоғары оқу орындарымен бірлесе отырып, академиялық хаб құру жолында белсенді жұмыс жүргізіп келеді. Біз еліміздің ғылыми-инновациялық әлеуетін арттыру үшін берік негіз қалыптастырып жатырмыз. CONNECTED 2024 конференциясы осы мақсатқа жетуге септігін тигізеді. Бүгінгі басқосу ғалымдар мен сарапшылардың халықаралық байланысын бекемдеуге, білім беру және адам капиталын дамыту саласына тың тәсілдер енгізуге жол ашады деп сенемін», — делінген Мемлекет басшысының хатында.

  Тамара Дүйсенова Мемлекет басшысының тапсырмасына сәйкес, әлемнің алдыңғы қатарлы 23 жоғары оқу орны елімізде жұмысын бастағанын атап өтті. Вице-премьер стратегиялық әріптестерге Үкімет атынан алғыс білдіріп, бұл қадамның негізгі мақсаты туралы айтты.

  Іс-шара бағдарламасы үш негізгі вертикаль шеңберінде құрылған: «Future Shaping», «Future Education & Science» және «EdTech and Impact Entrepreneurship». Конференция аясында білім мен ғылымды дамыту жөніндегі шешімдер ұсынылып, талқыланатын болады.

  Іс-шараның негізгі вертикалдарының бірі «Болашақтың білімі мен ғылымы» (Future Education And Science) деп аталды. Панельдік сессияларға қатысушылар жаһандық көшбасшылық үшін зияткерлік капиталды қалыптастыру, жоғары білімнің бәсекеге қабілеттілік стратегиясын құру және заманауи сын-қатерлер мен мүмкіндіктерді ескере отырып, ғылымның жаңа моделін әзірлеу мәселелерін қарастырды.

  «Жоғары білімнің жаһандық бәсекеге қабілеттілігі: стратегия құру» панельдік сессиясы аясында ҚР Ғылым және жоғары білім министрі Саясат Нұрбек бүгінгі таңда Қазақстанның білім беру жүйесінің алдында базалық ғылымдардың оқу бағдарламасының қолда бар негізін жоғалту немесе білім берудің консервативті өзегін сақтау дилеммасы тұрғанын атап өтті. Министрлік басшысының айтуынша, түбегейлі өзгерістердің көп бөлігі жасанды интеллектке байланысты.

  Екі күнге жоспарланған конференцияның негізгі спикерлері: жазушы және гуманист Герд Леонгард; Жасыл экономика саласындағы Нобель сыйлығының лауреаты Рае Квон Чунг; футурологтар қауымдастығының президенті, Еуропалық комиссияның форсайт кеңесшісі Таня Шиндлер; Оксфорд университетінің профессоры және «Жібек жолы. Әлемнің жаңа тарихы» бестселлерінің авторы Питер Франкопан; «Қытайдың жасыл құдайы» және жасыл дамудың адвокаты Пэгги Лю; Стэнфорд университетінің профессоры, ЖИ бойынша курстар авторы Юнес Бенсуда Мурри; бестселлер авторы, WIRED журналының алғашқы бас редакторы Дэвид Роуэн; футуролог, трендтер аналитигі, экономист, БҰҰДБ-ның болашақ мәселелері жөніндегі ғылыми қызметкері Бронвин Уильямс; тибет ламасы, мастер, автор Шьялпа Тензин Ринпоче; Африканың ең ықпалды адамдарының (Forbes) ТОР-10 кіретін жүйелік ойшыл және меценат Мамаду Квиджим Туре және т.б.

  Сондай-ақ, іс-шараның басты спикерлерінің бірі Юваль Ной Харари – тарихшы, футуролог, адамзаттың болашағы туралы бестселлерлер авторы.

Ақпарат көзі: Қазақстан Республикасы Ғылым және жоғары білім министрлігі