Астанада Enactus студенттік кәсіпкерліктің әлемдік кубогының жеңімпаздары аталды

  «Enactus World Cup 2024» әлем чемпионаты 2024 жылғы 2-4 қазан аралығында Қазақстанда өтті. Бұл шара студенттік кәсіпкерлікті дамыту, инновациялық жобаларды таныстыру және халықаралық байланыстарды нығайту мақсатында ұйымдастырылды. Enactus — тек жаңа идеяларды көрсету алаңы ғана емес, сондай-ақ әр елдің студенттеріне тәжірибе алмасу және достық қарым-қатынастар орнату мүмкіндігін беретін платформа.

  Бұл жолғы чемпионатқа 33 елден келген командалар қатысып, өз жобаларын қорғады. Сайыс нәтижесінде 16 үздік команда іріктеліп алынып, төрт лигаға бөлінді. Қазақстанның намысын қорғаған «Enactus Kazakhstan» командасы да осы үздіктер қатарында болды, олар өз жобаларын көрсетіп, жарқын идеяларын ұсынды.

  Шараның жабылу салтанатына ҚР Ғылым және жоғары білім министрі Саясат Нұрбек арнайы қатысып, студенттердің жетістіктерін атап өтті. Ол І.Жансүгіров атындағы Жетісу университеті студенттерінің жобасына жоғары баға беріп, олардың идеялары мен бастамаларын қолдайтынын айтты.

  Чемпионаттың финалында Марокко, Корея, Тунис және Германия командалары бақ сынап, нәтижесінде бірінші орынды Тунис командасы жеңіп алды. Олардың жобасы инновациялық шешімдерімен ерекшеленді және халықаралық деңгейде жоғары бағаланды.

  Бұл чемпионат студенттердің кәсіпкерлік дағдыларын дамытуға, стартап идеяларын іске асыруға және әлемдік нарықта бәсекелестік қабілетін арттыруға мүмкіндік берді. Сонымен қатар Enactus платформасы арқылы жастардың креативтілік қабілеттерін ашып, оларды халықаралық деңгейде танытуға жол ашылды.

  Алдағы уақытта «Enactus World Cup» чемпионаты дәстүрлі түрде жалғасып, жастар арасында кәсіпкерлік рухын арттыруға, инновациялық жобаларды жүзеге асыруға серпін беретініне сеніміміз мол.

Ақпарат көзі: Қазақстан Республикасы Ғылым және жоғары білім министрлігі