Астанада ерекше білім беру қажеттіліктері бар балаларға инклюзивті білім беруді іске асыру мәселелері бойынша білім беру мекемелерінің басшыларына арналған республикалық ғылыми-практикалық конференция өтті, деп хабарлайды елорда әкімдігінің ресми сайты.

Іс-шара Астана қаласы әкімдігінің №2 педагогикалық-психологиялық түзету кабинетінің ашылғанына 10 жыл толуына орайластырылды.

Конференцияны Астана қаласының Білім басқармасы мен Әдістемелік орталығы ұйымдастырды. Тақырыбы «Инклюзивті және арнайы білім беру аспектілері: сабақтастық пен мүмкіндіктер» деп аталды.

Республикалық конференцияның мақсаты – өзекті мәселелерді талқылау және республика аймақтарында инклюзивті білім беруді дамыту мәселелерін шешу, мұғалімдердің кәсіби құзіреттілігін арттыру, ерекше қажеттіліктері бар балалармен жұмыс істеудің тәжірибесімен алмасу, білім беру ұйымдары мен мамандар арасындағы ынтымақтастықты нығайту, жаңа идеялар мен жобаларды дамыту.

Конференцияға Оқу-ағарту министрлігінің Инклюзивті және арнайы білім беру департаментінің мамандары, Ы.Алтынсарин атындағы Ұлттық білім академиясының инклюзивті білім беру орталығының мамандары, Арнайы және инклюзивті білім беруді дамытудың Ұлттық ғылыми-практикалық орталығының және Балаларды ерте дамыту институтының өкілдері, өңірлердің Білім басқармаларының мамандары, әдістемелік орталықтардың (кабинеттер) әдіскерлері, жалпы орта білім беру ұйымдарының басшылары, педагогтер, БАҚ өкілдері, қоғамдық ұйымдардан шақырылған қонақтар қатысты.

Сондай-ақ, іс-шара аясында Астана қаласы әкімдігінің №1 және №2 педагогикалық-психологиялық түзету кабинеттері, №2 арнайы мектеп және №65 мектеп-гимназиясы педагогтері өздерінің озық іс-тәжірибелерімен бөлісті.

Ақпарат көзі: ГУ «Аппарат акима города Астана»