«Ауыл аманаты» жобасы ауылдағы ағайынның табысын арттырып қана қоймай, ірі кәсіпорындарға қолайлы жағдай туғызуға сеп бола алады. Мұның айқын мысалы ретінде Батыс Қазақстан облысында қол қойылған келісімді келтіруге болар.

Ауыл шаруашылығы тауарларын өндіруге бел буған азаматтар үшін ең негізгі мәселелердің бірі – өнімін сату жолын реттеу екені анық. Ал ірі кәсіпорындарға сапалы әрі таза азық-түлік сатып алу маңызды. Батыс Қазақстан облысында ортақ мүдде ресми құжатпен бекітілді. Аймақ әкімдігі мен Karachaganak Petroleum Operating компаниясы арасында жергілікті тауар өндірушілерді қолдау жөніндегі меморандумға қол қойылды.

Облыс әкімі Нариман Төреғалиев бұл келісім жергілікті шаруалар үшін қолайлы боларын атап өтті.

“Мемлекет басшысы ауылдық жерлердегі кәсіп иелеріне барынша көңіл бөлу қажеттігін айтып өткен болатын. Бүгінгі келісім «Ауыл аманаты» жобасы аясында кәсіп ашып, шаруасын дөңгелетіп отырған ауылдықтар үшін бұл жақсы мүмкіндік. Ауылдағы азаматтардың сапалы тауарларына тағы бір ірі әрі тұрақты тұтынушы табылды деуге болады», - деді аймақ басшысы.

Karachaganak Petroleum Operating компаниясы бас директорының орынбасары Мұхтар Манкеев келісім кәсіпорынға да пайдалы боларына баса мән берді.

«Кеңсе, зауыттарымыз Батыс Қазақстан өңірінде тұрғандықтан, жергілікті сапалы өнімдерді пайдалану біз үшін тиімді. Ауыл шаруашылығы тауар өндірушілерімен тығыз қарым-қатынаста жұмыс істеуге әзірміз», - деді ол.

Батыс өңірде логистика мәселесі өткір тұр. Елдімекендердің бір-бірінен қашық орналасуы тауар тасымалдау кезінде бағаға әсер етеді. Бұл мәселені шешуге орталық оператор ретінде «Ақ Жайық» әлеуметтік кәсіпкерлік корпорациясы қатыспақ. Жоспар бойынша, олар шаруаларды түрлі қолдау бағдарламалары арқылы қажетті техникамен қамтып, өнім тасымалдау кезінде демеу болмақ.

Аймаққа жұмыс сапарымен келген ҚР Премьер-Министрінің орынбасары Тамара Дүйсенова меморандумның маңыздылығына тоқталды.

«Бұл келісімнен барлық тараптар ұтады деп санаймын. Біздің елімізде ірі өндіріс ошақтары көп. Барлығында да сапалы азық-түлікке деген сұраныстары бар. Сол себепті бүгінгі тәжірибе өзге кәсіпорындарға үлгі боларына сенімдімін», - деп атап өтті Тамара Дүйсенова.

Ақпарат көзі: ГУ «Аппарат акима Западно-Казахстанской области»