Акциялар нарығын капиталдандыру негізінен KASE индексінің өкілдік тізіміне кіретін «Кселл» АҚ (+9,0%), «ҚазМұнайГаз» ұлттық компаниясы» АҚ (+5,2%) және «Қазақстан Халық банкі» АҚ (+2,5%) акциялары бағасының өсуі есебінен 2024 жылғы тамызда 0,2%-ға немесе 0,6 трлн теңгеге (2024 жылдың басынан бастап 23,3%-ға өсу) ұлғайып, 2024 жылғы 1 қыркүйектегі жағдай бойынша 33,0 трлн теңгені құрады.

KASE индексі 2024 жылғы тамызда 1,3%-ға 5 304,1 тармаққа дейін өсті (2024 жылдың басынан бастап 26,7%-ға өсті).

Акциялармен сауда-саттық көлемі негізінен «АҚ Алтыналмас» АҚ, «Алтай Ресорсиз» АҚ және «Кселл» АҚ акцияларымен сауда-саттық көлемінің төмендеуі есебінен бір айда 83,4%-ға немесе 45,8 млрд теңгеге азайып, 2024 жылғы тамызда 9,1 млрд теңгені құрады.

2024 жылғы 1 қыркүйектегі жағдай бойынша «Қазақстан қор биржасы» АҚ (бұдан әрі – KASE) сауда тізімдерінде 85 эмитенттің 100 атауының акциялары болды, оның ішінде 2 эмитенттің 2 атауының акциялары «Листингтік емес бағалы қағаздар» секторында айналысқа жіберілді. 

«KASE Global» секторында 2024 жылғы 1 қыркүйектегі жағдай бойынша 46 түрлі акция, 55 шетелдік эмитенттің 12 ETF болды. «KASE Global» секторындағы сауда-саттық көлемі негізінен Apple Inc., NVIDIA Corp. және Tesla, Inc. акцияларының сауда-саттық көлемінің төмендеуі есебінен  бір айда 64,6%-ға немесе 5,2 млрд теңгеге азайып, 2024 жылғы тамызда 2,9 млрд теңгені құрады.

KASE-де саудаланатын корпоративтік борыштың көлемі 2024 жылғы тамызда негізінен корпоративтік облигациялардың бастапқы нарығындағы сауда-саттық көлемінің өсуі есебінен 14,2 трлн теңгеге дейін 0,4%-ға немесе 60,7 млрд теңгеге ұлғайды (2024 жылдың басынан бастап 5,2%-ға өсу).

2024 жылғы тамызда KASE-де корпоративтік облигациялармен сауда-саттық көлемі негізінен бастапқы нарықтағы сауда-саттық көлемінің азаюы есебінен өткен аймен салыстырғанда 38,8%-ға немесе 315,3 млрд теңгеге 496,9 млрд теңгеге дейін азайды. 2024 жылғы 1 қыркүйектегі жағдай бойынша KASE сауда-саттық тізімдерінде 119 эмитенттің корпоративтік облигацияларының 451 шығарылымы болды.

2024 жылғы тамызда корпоративтік облигациялардың бастапқы нарығының көлемі 2024 жылғы шілдедегі көрсеткішпен салыстырғанда 68,7%-ға немесе 523,1 млрд теңгеге төмендеп, 238,7 млрд теңгені құрады. 2024 жылғы тамызда 9 эмитенттің корпоративтік облигацияларының 10  шығарылымы орналастырылды, купондық сыйақы мөлшерлемесі 4,0%-дан 28,5%-ға дейін өзгеріп отырды.

KASE-де саудаланатын мемлекеттік борыш жекелеген МБҚ шығарылымдары шығарылған шетел валюталарына қатысты теңге бағамының әлсіреуіне байланысты 2024 жылғы тамызда 1,2%-ға немесе 0,3 трлн теңгеге 27,0 трлн теңгеге дейін ұлғайды (2024 жылдың басынан бастап 13,4%-ға өсу).

KASE-де мемлекеттік бағалы қағаздармен сауда-саттықтың жиынтық көлемі бастапқы нарықтағы сауда-саттықтың көлемінің азаюы нәтижесінде бір айда 53,2%-ға немесе 588,2 млрд теңгеге азайып, 2024 жылғы тамыз айының қорытындысы бойынша 0,5 трлн теңгені құрады. 

МБҚ бастапқы нарығындағы сауда-саттық көлемі 60,7%-ға немесе 594,3 млрд теңгеге 384,3 млрд теңгеге дейін төмендеді. ҚР Қаржымині 9 облигациялар шығарылымын орналастырып, өтеуге табыстылығы 13,16-13,41%-ды құрайтын 282,4 млрд теңгені тартты. Оның ішінде 101,9 млрд млрд теңгені он үш облыстың және Алматы, Астана, Шымкент қ. әкімдіктері мемлекеттік бағдарламаларды іске асыру шеңберінде тартты.

Ұжымдық инвестициялау нарығында 2024 жылғы 1 қыркүйектегі жағдай бойынша 54 инвестициялық пай қоры, оның ішінде 25 аралық, 29 жабық және 1 ашық пай қоры жұмыс істеді.

Инвестициялық пайлар нарығындағы басқарудағы активтер негізінен жекелеген инвестициялық қордың 4,4 млрд теңге мөлшерінде ҚР эмитенттерінің мемлекеттік емес бағалы қағаздарын сатып алу есебінен 2024 жылғы тамызда 3,3%-ға немесе 9,6 млрд теңгеге ұлғайып, 2024 жылғы 1 қыркүйектегі жағдай бойынша 298,0 млрд теңгені құрады. 2024 жылғы 1 қыркүйектегі жағдай бойынша бағалы қағаздар портфелі 258,3 млрд теңгені немесе инвестициялық пай қорларының жиынтық активтерінің 86,7%-ын құрады.

2024 жылғы 1 қыркүйектегі жағдай бойынша бағалы қағаздар нарығының институционалдық құрылымына 40 брокер мен дилер (16 банк және 24 банктік емес ұйым), 11 кастодиан-банк, 21 инвестициялық портфельді басқарушы, 3 трансфер-агент, сондай-ақ 3 инфрақұрылымдық ұйым: KASE, KASE Клирингтік орталығы және бірыңғай тіркеуші мен  сауда репозиторийінің функцияларын орындайтын Бағалы қағаздардың орталық депозитарийі кірді.

2024 жылғы тамызда Орталық депозитарийдің номиналды ұстау жүйесіндегі шоттардың саны 10,3%-ға немесе 306,9 мыңға ұлғайып, 3 291,5 мың  шотқа жетті, оның ішінде:

- депоненттер клиенттерінің қосалқы шоттарының саны 683,2 мың қосалқы шотқа дейін 1,2 мыңға немесе 0,2%-ға ұлғайды (2024 жылдың басынан 13,2 мыңға немесе 1,9%-ға азаю);

- брокерлер ашқан және жинақталған омнибус-шоттар арқылы есепке алынатын дербес шоттар саны 2 608,3 мың шотқа дейін 305,7 мыңға немесе 13,3%-ға өсті (2024 жылдың басынан 859,3 мыңға немесе 49,1%-ға өсу).

Бағалы қағаздар нарығына кәсіби қатысушылардың активтері негізінен мемлекеттік бағалы қағаздарды жекелеген қатысушылардың сатып алуы есебінен 2024 жылғы тамызда 1,5%-ға немесе 10,7 млрд теңгеге ұлғайып, 2024 жылғы 1 қыркүйектегі жағдай бойынша 737,3 млрд теңгені құрады (2024 жылдың басынан бастап 4,9%-ға ұлғаю). Міндеттемелер алынған қарыздардың 1,9 млрд теңгеге ұлғаюы себебінен 241,7 млрд теңгеге дейін 0,9%-ға немесе 2,3 млрд теңгеге өсті (2024 жылдың басынан 0,6%-ға өсті). Меншікті капитал бөлінбеген пайданың өсуі нәтижесінде 1,7%-ға немесе 8,4 млрд теңгеге 495,6 млрд теңгеге дейін ұлғайды.

Сыртқы коммуникациялар Басқармасы

+7 (727) 237 1089, press@finreg.kz

Ақпарат көзі: Қазақстан Республикасының Қаржы нарығын реттеу және дамыту агенттігі