Батыс Қазақстанда су тасқынынан зардап шеккендерге баспана салу мәселесі 100 пайызға шешілді.

Атап айтқанда, тасқыннан зардап шеккен тұрғындарға 775 үй берілді.

Орал қаласында 375 үй, аудандарда 400 үй.

Сонымен қатар, бастапқы және қайталама нарықта 2100 тұрғын үй сатып алынды. Бұл тұрғын үйлер демеушілердің қаражатына сатып алынған болатын.

Осылайша 1 қыркүйекке дейін тұрғындарды баспанамен қамту керек деген Президенттің берген тапсырмасы БҚО-да уақытылы орындалып отыр.

Естеріңізде болса, сәуір айында Мемлекет басшысы Қасым-Жомарт Тоқаев су тасқынынан зардап шеккен БҚО Қаратөбе ауданы, Қоржын ауылына барып, тұрғындармен кездескен еді.

Сол кездесуінде Президент зардап шеккен тұрғындар көмексіз қалмайтынын айтқан еді.

Осыған орай, БҚО Қаратөбе ауданында құрылысы аяқталған соңғы 90 үй пайдалануға берілді.

Жаңа баспанаға ие болған Қоржын ауылы тұрғындарының қуанышында шек жоқ.

“Басында ертеңгі күніміз не болады деп ойлап едік. Алайда Президенттің сөзі бізге жігер берді. Міне, бүгін сол сөзі іс-жүзінде жүзеге асты. Өте қуаныштымыз. Баспаналы болдық”-деді ауыл тұрғыны Абай Мырзабаев.

Батыс Қазақстан облысы әкімдігінің баспасөз қызметі

Ақпарат көзі: ГУ «Аппарат акима Западно-Казахстанской области»