23 маусым – Полиция қызметкерлерінің кәсіби мерекесіне орай БҚО әкімі Нариман Төреғалиев облыс орталығында өткен салтанатты шараға қатысып, тәртіп сақшыларын кәсіби мерекелерімен құттықтады.

        Облыс әкімі полицейлердің қоғамдық тәртіпті сақтау мен азаматтардың қауіпсіздігін қамтамасыз ету жолындағы еңбектері құрметке лайық екенін атап өтті.

       «Мемлекет басшысы Қасым-Жомарт Кемелұлы Тоқаев айтқандай, ішкі істер органдарының әрбір қызметкері әділ, ашық және адал болуы керек. Құқық қорғау жүйесі – мемлекеттігіміздің берік негізі, елдегі тұрақтылықтың басты кепілі. Батыс Қазақстандық тәртіп сақшылары құқықтық тәртіпті, азаматтардың қауіпсіздігін қамтамасыз ету жолында аянбай еңбек етуде. Кәсіби біліктіліктеріңіздің арқасында қоғамда тұрақтылық қалыптасып, азаматтардың құқық қорғау органдарына сенімі артуда. Кешегі көктемгі су тасқынымен күрес кезінде де  алдыңғы сапта болдыңыздар. Облысымыздағы 1500-ден аса полиция қызметкері тасқын кезінде күні-түні тәртіп пен тыныштықты қамтамасыз етті. Еңбектеріңіз зор құрметке лайық»,- деп атап өтті Нариман Төреғалиев.

         Шара барысында облыс әкімі мінсіз қызметімен көзге түскен полиция қызметкерлерін марапаттады.

         Сонымен қатар, тәртіп сақшыларына  ІІМ-нің алғыс хаттары мен грамоталары, қызметтік шендер табыс етілді.

         Биыл жыл басынан бері БҚО бойынша 1246 қылмыстық құқық бұзушылық фактілері тіркелген. Бұл өткен жылғы деректермен салыстырғанда  38%-ға төмен.

         2023 жылы БҚО полициясының материалдық-техникалық базасы жаңартылып, 140-тан астам автокөлік сатып алынды, сондай-ақ олардың ішінде жылдамдық асырушы жүргізушілерді анықтауға септігін тигізетін «Кибер-Шриф» жүйесі орнатылған автокөліктер де бар.

БҚО әкімдігінің баспасөз қызметі

Ақпарат көзі: ГУ «Аппарат акима Западно-Казахстанской области»