Бүгін облыс әкімі Бейбіт Исабаев Жапонияның Төтенше және Өкілетті Елшісі Джун Ямадамен кездесу өткізді, - деп хабарлайды облыс әкімінің баспасөз қызметі.

Ресми қонақтарды қарсы алған Бейбіт Исабаев кездесуде Жетісу облысының негізгі даму бағыттарына тоқталды.

- Біздің аймақтың қайта құрылғанына көп уақыт өткен жоқ, небәрі 2 жыл болды. Аймақта шамамен 700 мыңдай халық, 100-ге жуық этнос өкілдері тұрады. Біздің аумағымыз өте үлкен, 118 мың шаршы шақырымнан асады. Өңір аграрлық, бұл ретте көліктік-логистикалық әлеуетті дамытуға ерекше мән беріледі, өйткені біз Қытаймен шекараласпыз, оған қоса туризм саласының да мүмкіндігі мол. Тау туризмін, Алакөл мен Балқаш көлдерінің жағасын дамытамыз. Сондай-ақ, баламалы энергетиканы дамытудың зор перспективалары бар. Сондықтан осы мүмкіндікті пайдалана отырып, жапондық компанияларды, бизнесмендер мен инвесторларды, әсіресе ауыл шаруашылығы өнімдерін өңдеу, туристік және басқа да салаларда ынтымақтастыққа шақырамыз, - деді өңір басшысы. Сондай-ақ, Жапониядағы сакураның гүлдеуіне ұқсас, жер бетіндегі алма атаулының атасы саналатын Сиверс алма ағашының гүлдеуі фестивалі Жетісуда жыл сайын өткізілетінін атап өтті.

Өз кезегінде Джун Ямада жылы қабылдау үшін алғыс білдіріп, Қазақстандағы дипломатия саласындағы жұмысы туралы қысқаша айтып берді. Ресми өкілдің айтуынша, бұл - оның Талдықорғанға алғаш келуі. «Қазақстанда 3 жылдан бері жұмыс істеймін. Үнемі әртүрлі аймақтарға шығып тұруға тырысамын. Әр жердің өз аурасы бар. Сіздердің аймақтарыңызға келгенде жағымды рухани күй кештім», - дейді ол.

Әңгімелесу барысында Бейбіт Исабаев тірек-қимыл аппаратында қиындығы бар адамдарды оңалту мақсатында «Шөптің тамыры» жобасы аясында грант бөлгені үшін Жапония Елшілігіне ризашылығын білдірді. Сол гранттың арқасында Талдықорғанда Елдос Баялышбаев «Асар» спорттық-оңалту орталығын тірек-қимыл аппараты бұзылған адамдарды оңалту үшін озық заманауи құралдармен жабдықтады. Соның нәтижесінде жыл сайын ерекше қажеттігі бар 400-ден астам азаматқа қызмет көрсетеді.

- Біз өз тарапымыздан да қолдау көрсетеміз. Биыл мемлекеттік әлеуметтік тапсырыс шеңберінде жергілікті бюджет есебінен «Асар» орталығымен 90 млн. теңге сомасына шарт жасалды. Биылғы жылдың басынан бері оңалту іс-шараларына 200-ден астам адам тартылды. Жыл сайын мемлекеттік әлеуметтік тапсырыс аясында қолдау көрсетуді жалғастырамыз. Елдос Баялышбаев қалалық мәслихаттың депутаты, қоғамдық жұмыстармен де белсенді айналысады. Жалпы жақсы іс тындырылды. Сіздер, Жапония елшілігі, осы әлеуметтік маңызды жобаның бастауында тұрдыңыздар. Жанашырлық пен қолдау көрсеткеніңіз үшін тағы да шын жүректен алғыс айтамын, - деп түйіндеді облыс әкімі өз сөзін.

Бүгінгі сапар аясында «Асар» спорттық-оңалту орталығына барғанын айтқан Жапонияның Төтенше және Өкілетті Елшісі жоба ынтымақтастықтың айқын үлгілерінің бірі болып отырғанын тілге тиек етті. Жасалған істі көріп елшілік өкілдері қанаттанғанын айтады. Жапонияның осы саладағы  медицина мамандары бір күндері осы орталыққа келеді деп жоспарланып отыр. Сондай-ақ келесі жылдан бастап Алматы-Токиоға тікелей ұшақ шығатыны тағы бір жақсы жаңалық екенін атап өткен елші мырза бұл екі ел арасындағы байланыстарды кеңейтуге деген жақсы қадам екенін жеткізді.

Кездесу соңында тараптар бұл сапар әртүрлі салалардағы екіжақты қатынастарды одан әрі нығайтуға бағытталған кезекті қадам болатынына сенім білдірісті.

Айта кетейік, 2024 жылдың қаңтар-сәуір айларында Жетісу облысы мен Жапония арасындағы тауар айналымының жалпы көлемі 400 мың АҚШ долларын құрады.

Жетісу облысы әкімінің баспасөз қызметі.

Фотографтар: Жеңіс Ысқабай, Руслан Кадыров

Ақпарат көзі: Жетісу облысының әкімдігі