Серік Шәпкенов Исатай ауданына жұмыс сапары аясында аудан тұрғындарымен кездесіп, өтініш-тілектерін тыңдады.

Алдымен Серік Шәпкенов ауданда атқарылып жатқан жұмыстар туралы баяндама жасады. Мұнда ауданда шалғай орналасқан Қызыл үй мен Жасқайрат елді мекендеріне тас жол салу мәселесі өзекті.

- Қазір Қызыл үй (36км) және Жасқайрат(40 км) елді мекендерінде тас жол болмағандықтан, жету қиындық келтіреді. Ауа-райының қолайсыз кездерінде тіптен қиын. Биыл 5-санатты құрайтын екі ауылдың жолына жоба жасалып, Қызыл үйге сараптаманың оң қортындысы алынып, ашық электрондық конкурсқа берілді. Қазан айында мердігер мекеме анықталды. Құрылыс жұмыстары жыл аяғына дейін басталады. Ал Жасқайрат ауылы келер жылдың басында мемлекеттік сараптамаға жіберіледі,-деді С.Шәпкенов.

Кездесуде Серік Шәпкенов Исатай ауданында сақалды құрылыстың көптігін атап өтті.

- Қазір облыс бойынша құрылысы басталса да әлі күнге тұрақтап қалған сақалды құрылыстың көбі - Исатайда. Мердігер мекемелердің жауапсыздығынан осындай мәселе болып отыр. Бұл реттегі жұмыстар қолға алынып, жаңа шешімдер қабылданды. Соның бірі - аудандағы каналдар. Күрделі жөндеу жұмыстары былтырғы күйі қалды, республикалық мекемеге жүргізеді. Тасқын кезінде көптеген канал ашылды. Енді олар облыс теңгеріміне алынып, «Табиғат» шаруашылық жүргізу құқығындағы мемлекеттік коммуналдық кəсіпорны құрылды. Күтіп-ұстау, тазарту жұмыстарын сол мекеме жүргізеді,-деді С.Шәпкенов.

Жиында тұрғындар ауыз сумен қамту, баспана беру, жол салу және басқа да коммуналдық мәселелерді көтерді. Өңір басшысы тұрғындар көтерген сауалдар өзектілігіне қарай кезең-кезеңімен шешілетінін айтты.

Кейін 20-ға жуық тұрғынды жеке қабылдап, олардың мәселесін сала мамандарымен бірге қарап, заң аясында жауап берді.

Серік Шәпкеновтің Исатай ауданы тұрғындарымен өткен кездесуі аудан әкімдігінің Facebook және Instagram желісіндегі ресии парақшаларында тікелей эфирде көрсетілді.

Ақпарат көзі: ГУ «Аппарат акима Атырауской области»