ЕҰУ да Eurasian Netherlands Business School ашылды

  Еуразия ұлттық университетінде Нидерланды бизнес академиясымен серіктестікте ЕҰУ құрған жаңа білім беру жобасы - Eurasian Netherlands Business School (ENBS) салтанатты ашылуы өтті.Eurasian Netherlands Business School кәсіби дағдыларды дамытуға бағытталған MBA, EMBA бағдарламалары және басқа курстар бойынша оқытуды қамтамасыз ету арқылы менеджмент, Бизнес және кәсіпкерлік саласындағы жоғары білікті мамандарды даярлауға бағытталған. Ашылу салтанаты бизнес, дипломатиялық миссиялар, халықаралық компаниялар және мемлекеттік органдар өкілдерінің қатысуымен өтті.

  «Бұл шара университетіміздің дамуының келесі кезеңі болып табылады. Бизнеске көмектесу және жаңа буын менеджерлерін даярлау үшін біз Нидерланды бизнес академиясымен бірге осы бизнес мектебін ашып отырмыз.Мектептің ашылуы кәсіпқой мамандарды дайындауда озық еуропалық әдістер мен тәсілдерді енгізе отырып, Қазақстанда бизнес-білім беруді дамыту үшін маңызды қадам болмақ», - деді ЕҰУ ректоры Ерлан Сыдықов.

  Нидерланды Бизнес академиясының президенті Ян ван Цвитен бүгінде академияда дүние жүзі бойынша 8 бизнес мектебі бар екенін және олардың барлығы бір-бірімен тығыз байланыста екенін айтты.

  «Қазақстанның халықаралық алмасу және тағылымдама бағдарламаларына қатысуға мүмкін болған 8 университеттің тобына қосылғанын хабарлауға қуаныштымын.Бизнес академиясының студенттері барлық мектептерде бірнеше тақырыпты таңдай алады. Бұл процеске тіпті Оксфорд та қатысады. Біз осы бизнес мектебіндегі барлық бағдарламаларды байланыстырамыз. Сондай-ақ ірі бизнес компанияларымен серіктестік арқылы жинақталған барлық тәжірибемізді осында әкелетін боламыз. Еуразия ұлттық университеті алғашқы қадамды жасап, дұрыс шешім қабылдады деп ойлаймын», - деді шетелдік қонақ.

  Шара барысында Нидерланды Корольдігінің Қазақстандағы дипломатиялық миссиясы басшысының орынбасары Наут ван Вауденберг те сөз алып, Қазақстан мен Нидерланды арасындағы дипломатиялық, сауда-экономикалық, әлеуметтік-мәдени қарым-қатынастар туралы айтты.Қазақстанның іскер әйелдері қауымдастығының мүшесі, «Romantic» гүл сататын дүкендер желісінің бас директоры Гүлзат Ізбасарова әйелдердің бизнестегі қызметі мен жетістіктеріне тоқталды.«Qaz Cloud» техникалық директоры Александр Перепеловтің сөзі киберқауіпсіздік мәселелеріне арналды.

  Айта кету керек, Нидерланды бизнес академиясы (Netherlands Business Academy) — 1982 жылы құрылған толық аккредиттелген бизнес мектебі. Мектеп Еуропалық Одақ жобаларына белсенді қатысады және бүкіл әлем бойынша 40-тан астам университеттермен ынтымақтасады. Академия үздіксіз білім беру идеясын белсенді түрде насихаттап, озық білімді бизнес-қоғамдастыққа қол жетімді етеді.

Ақпарат көзі: Қазақстан Республикасы Ғылым және жоғары білім министрлігі